Fleire hevdar at Donaudagen bør verte ein nasjonal minnedag i landet vårt.
Den 26. november 1942 kl. 14.55 gjekk troppetransportskipet D/S Donau frå kaia ved Akershus festning. Om bord i båten var stua saman 529 norske jødar. Vi finn menn, kvinner og born i alle aldrar frå 4 md. til 81 år. Det var norsk politi og tysk tryggingspoliti som samla saman denne store flokken av jødar. I Norge budde det denne tida samla godt 2000 norske jødar. Donau la til kai i Stettin i Polen fire dagar seinare. Alle dei 529 vart så sende med tog vidare til ein av dei største utryddingsleirane til nazistane – Auschwitz. Nokre vart plukka ut til slavearbeid, medan dei aller fleste vart sende rett i døden. Gass tok livet av om lag ¼ av alle norske jødar i løpet av krigen. Ni av dei 529 kom heim att til Norge etter krigen. Samla vart 729 norske jødar sende til desse dødsleirane. Som svært synlege symbol på Holocaust i Norge, er det lagt ned 757 snublesteinar landet rundt.
KrFU vil gjøre 26. november til nasjonal minnedag for ofrene etter holocaust
Vi kan knapt tenkje oss dei lidingar dei deporterte jødane måtte gjennom, før, undervegs og til slutt i dødsleiren i Auschwitz. Familiemedlemmer sat att i otte og med mange spørsmål dei ikkje fekk svar på. Alt dette ligg om lag 80 år attende i tida. Jødefolket har alltid vore ei av dei folkegruppene i verda som har gjennomgått ulike former for forfølging og hat. Dette har skjedd både i fortid og i notid. Ferske undersøkingar om tilhøva for jødar i Norge i dag gjev oss dystre svar. Antisemittismen har auka på dei seinaste åra. Dette gjeld jødane – men også andre grupper må tole ulike former for negative handlingar.
” … om de norske 700 jødar foreligger lite …”
Jødefolket fekk i 1948 tilbake sitt eige land. Mange jødar har funne vegen dit frå ulike kantar av verda. Dette landet, og dette folket må fram til i dag tole internasjonal motstand og fordøming. Slik også med dei mange millionar jødar som bur rundt i dei fleste av verdas land.
Norges grunnlov frå 1814 hadde forbod mot jødar til landet vårt. Dette vart heldigvis endra ca. 40 år seinare. I dag treng jødane vår støtte – vi må for ein kvar pris unngå nye holocaust. Ei lita brikke i dette arbeidet frå oss nordmenn kan faktisk vere å gjere 26. november til ein nasjonal minnedag. Vi treng slike påminningar både for notida og framtida. Å gløyme historia tener ikkje framtida.