Jenny Klinge skriv i sitt innlegg den 17.03 at formuesskatten (på arbeidande kapital) må ned.

Eg kunne ikkje vore meir einig med Jenny, som skriv godt i innlegget sitt og eg kan langt på veg seie meg einig med grunngivinga hennar. KrF har hatt politikk på dette med arbeidande kapital i mange år. Allereie i 2008 føreslo KrF avvikling på formuesskatt på arbeidande kapital. Vi gjekk til val på same politikk i 2013. Og fekk saman med Solberg-regjeringa endeleg gjennomført kutt i skatt på arbeidande kapital. Problemet her er at er at Senterpartiet taler med to tunger. For regjeringa Senterpartiet sjølv sitt i, aukar kraftig formuesskatten, og er nettopp besett på å «flå dei rike».

Finansminister Vedum og regjeringa har nesten dobla formuesskatten opp til 26,5 milliardar kroner i 2022, og Finansdepartementet foreslår enda ei auke til 29,5 milliardar no i 2023. Aksjerabatten blir redusert, utbytteskatten aukar, og dette fryktar Norsk Industri vil gå hardt utover norske bedrifter. Dette skjer på Senterpartiet si vakt, i samarbeid med Arbeidarpartiet og budsjettpartnar SV. Ironien i det heile er at regjeringa sjølve er årsak i ein sjølvoppfyllande profeti. Det er ikkje rart at «rikingane» som regjeringa kallar dei. Altså kapitalsterke investorar, «rømmer» til Sveits.

Regjeringa sin politikk er besett på å «ta dei rike», utan den sjølvinnsikt å sjå forskjellen mellom formuen i ein luksusyacht eller sjark. Villa eller industribygg, eller traktor eller Ferrari for den del.

Hadde enda regjeringa sin politikk spegla av forskjellen mellom privat formue, og den formuen som ligg i bedriftene (arbeidande kapital) kunne ein kanskje fått meir utvikling og investering i norsk industri og næringsliv. I staden får vi ein kapitalflukt av midlar vi heller skulle sett bli investeringar i norske bedrifter. Kapital vi sårt treng for å utvikle norske arbeidsplassar. Dette er dessverre resultatet av regjeringssamarbeidet Senterpartiet er i. Og Hurdalsplattformen er ganske klar på at formuesskatten skal opp. SV vil auke den enda meir enn regjeringspartia. Så den kjedelege situasjon for Senterpartiet er at dei seier ein ting her i fylket, medan dei gjer noko heilt anna på Stortinget og i regjering.

Resultatet? Dagens regjering har fått stempelet «Tidenes mest næringsfiendtlege regjering». Og vondt kan fort bli verre, med eit skattesystem som øydelegg opparbeidde midlar. Dette merkar industrien og næringslivet, litt for godt. Det trur eg veljarane kjem til å hugse.