Ny fylkesveg 650, frå Viset til Valgermo og Ørskogfjellet, gjennom Børdalen, vert ein viktig veg for ein stor region; Fjord kommune, kommunane Stranda og Ørskog. Til arbeidspendling, varetransport, flytting av store entreprenørmaskinar som knapt får plass på vegen i dag, gjennomgangstrafikken; Bergen/Trondheim og elles, turisttrafikken, som avlasting for E39 og som tilførselsveg til europavegen. I praksis den indre stamvegen som ein nyttig snarveg.

Innleggsforfattar: Knut Helge Harstad, ordførar i Ørskog kommune. Foto: Staale Wattø

Med ny veg Røyrhus – Hellesylt og gjennom Hornindal, ny kai i Liabygda, og bru i indre Nordfjord, vil trafikken auke.

Børdalsvegen bygd i eitt steg, har vore Ørskog sitt klare mål. Folkeaksjonen 2018 markerte den målsettinga svært tydeleg. Børdalsvegen vert raskast, mest trafikktrygg, mest praktisk og mest økonomisk på lengre sikt.

Den eksisterande fylkesvegen, utan gjennomgangstrafikken, vert den trygge vegen for lokaltrafikken, og skaper utvikling i lokalsamfunna langs vegen. Gang- og sykkelvegen har vi allereie på ei vesentleg strekning.

Ørskog kommunestyre sitt siste samrøystes vedtak denne hausten rår nye Ålesund til:

1) at det vert teke initiativ for å få fylkeskommunen til å sende ein søknad til staten om overtaking av fv. 650, og gjere denne til riksveg igjen.

Det må setjast krav til staten om å bygge Børdalsvegen på strekninga frå Viset til ny E39.

2) Om staten ikkje vil ta over fv. 650, må fylkeskommunen som vegeigar igjen kontaktast for å bygge vegen gjennom Børdalen, med von om statleg tilskot.

3) Om ikkje nokon av alternativa med statleg utbygging eller fylkeskommunal utbygging med statleg tilskot, får gjennomslag, må eksisterande veg utbetrast. Det vert eit kostbart prosjekt, med dårlegare miljø- og trafikal løysing og utryggare veg, framleis med fartsreduksjon.

4) Før ei slik utilrådeleg dårlegare løysing vert planlagt ber Ørskog kommunestyre om at det i g j e n vert gjort ny vurdering av den gode framtidsretta løysinga gjennom Børdalen, framfor lapping på ein gamal veg frå fortida.

Ørskog kommune begynte for meir enn 20 år sidan på ei utgreiing i nært samarbeid med Statens vegvesen, då vegen her var riksveg.

Kommunane Stordal og Norddal skaffa betydelege midlar frå næringslivet, og samarbeidet meisla ut 5 alternative vegføringar som ville korte inn vegstrekninga og gjere det mogleg å føre gjennomgangstrafikken utanom grendene frå Viset til Valgermo, og utanom trafikkplaga Sjøholt sentrum.

Kostnadsvurderinga gav bekymring for å gå vidare med Børdalsvegen, og det vart tenkt heller ei løysing med å utbetre eksisterande veg stykkevis, ev. med noko omlegging. Eg vil ikkje kritisere slike vurderingar sjølv om Ørskog kommunestyre tenkte annleis.

Ørskog kommunestyre vedtok i 2015 at Børdalsvegen skulle utgreiast vidare.

Arbeidet har vore prega av motgang, men optimisme, (kombinasjonen er mogleg) medan målsettinga om ein framtidsretta trygg veg har vore fast.

Krav om framdrift har møtt nedslåande svar trass venta auke i trafikken.

Utfordringa med trafikkauke på den aldrande vegen har fleire hindringar; svingar rundt fjellknausar, to eldre bruer med sving, og nedsett fart på grunn av smal veg utan midtstripe, plage for busetnaden, ikkje minst i Sjøholt sentrum, til hinder for kryssande trafikk i landbruksdrifta og elles negativ for landbruksdrifta slik vegen deler gardsbruka.

All vegutbygging er økonomisk utfordrande for fylke og stat, og heller ikkje her vert trafikksituasjonen løyst utan betydelege investeringar.

Med kommunesamanslåinga er det venta at arbeidet som ikkje har ført til ei løysing enno, vert ført vidare av Nye Ålesund kommune og Fjord kommune – som har «skoa» på.

Intensjonsavtalen for Nye Ålesund kommune er klar på prioritering av også Børdalsvegen på ein trafikksikker måte, og fellesnemnda har gjort vedtak om å støtte samarbeidet for å kunne knyte fylkesvegen til ny europaveg over Ørskogfjellet.

Børdalsvegen kan verte den svært nyttige vegen inn i framtida for ein stor region!

-------------------------------------------

Har du noko på hjartet? Send eit innlegg til debatt@smp.no

Her finn du alt meiningsstoffet på smp.no!