For Kleven var det stas då dei fekk kontrakt med det malaysiske reiarlaget IES Pioneer Ltd på eit 93 meter langt fleirbruksskip. Overleveringa skulle først skje september i fjor og vart deretter utsett til april i år, men enno er ikkje leveringa avklara. No tar Kleven høgde for at fartøyet, bygg nummer 379, blir eit tapsprosjekt.

– Årsaka til underskotet ligg i tap og store tapsavsetningar knytt til enkeltprosjekt, særleg byggnr. 379, skriv Kleven i ei pressemelding.

Verftet prøver å gjere det beste ut av situasjonen og håper å finne sysselsetting for skipet.

Meir enn offshore

Samtidig har Kleven tru på overskot i år.

– Ei solid ordrebok og nye kontraktar med blant anna Hurtigruten, gjer at vi er trygge på at vi skal snu det dårlege 2015-resultatet til eit positivt resultat for 2016, seier konsernsjef ved Kleven, Ståle Rasmussen.

Kleven opplyser at dei har 18 fartøy i ordreboka, til ein samla verdi på rundt 11,5 milliardar kroner.

I april lyste verftet ut ti nye jobbar.

– Vi har ei solid ordrebok, med levering til mange ulike segment som er uavhengige av svingingane i offshoremarknaden. Fiskefartøy, yacht, fartøy for utvinning av diamantar på havbotnen, brønnbåtar og kabelleggar er nokre av desse. I tillegg kjem den nyleg stadfesta kontrakten med Hurtigruten på levering av opptil fire store hurtigruter som også skal nyttast som ekspedisjonsskip i polare strøk, seier Rasmussen og held fram:

– Det at vi vinn kontraktar i dagens tøffe internasjonale konkurranse viser at vi har tillit i marknaden, og vi er trygge på at vi skal snu det dårlege 2015-resultatet til positivt resultat for 2016, seier Rasmussen.

Sju nybygg i fjor

Driftsinntektene for konsernet utgjorde i 2015 3,7 milliardar kroner, ein reduksjon frå 5 milliardar i 2014. Det var eit lågare aktivitets- og marginnivå i 2015 enn normalen dei siste åra.

Konsernet leverte i løpet av 2015 sju nybygg. Samla kontraktsverdi for dei leverte skipa er om lag 4,4 milliardar kroner. Myklebust Verft gjennomførte i tillegg fleire ettermarknadsoppdrag.

Konsernet ser også ein auke i volumet for ettermarknadstenester retta mot offshorereiarlaga, og meiner dei her er godt posisjonerte, med ei flytedokk som er stor nok til å dokksetje dei aller fleste skipa i flåten.

Ved utgangen av 2015 hadde konsernet 710 tilsette, mot 766 i 2014.