Hurtigruten og selskapets eigarar, det britiske forvaltningsselskapet TDR og Petter Stordalen, blir største aktør i Klevenkonsernet, med ein andel på litt over 40 prosent.
Det melder Kleven-konsernet i ei pressemelding fredag morgon.
Investorar går inn med 300 millionar kroner i ny kapital i Klevenkonsernet. Investorgruppa består også av Åge Remøy og Magnus Roth gjennom InYard Invest, det familieeigde tyske selskapet Lürssen-Group og investoren Per Lillebø. Også Kleven-familien sine selskap John Kleven AS og H-Invest AS har skote inn pengar.
Reforhandla låneavtale
Kleven verft har 4 milliardar i gjeld
– Det er semje mellom investorane om avtalen, men nokre formelle atterhald gjeld framleis. Mellom anna må selskapet sine bankar og Giek godkjenne avtalen, men dei har vore tett involverte i arbeidet heile tida, så det er grunn til å tru at også den delen av prosessen kjem endeleg på plass, seier Kleven-direktør Ståle Rasmussen i pressemeldinga.
– Samfunnsengasjerte og dyktige eigarar
Ved Kleven i Ulsteinvik, som ligg like ved leia der Hurtigrutens skip har seila året rundt i snart 125 år, er dei nøgde med storsatsinga frå investorgruppa.
– Vi er glade for interessa vi har opplevd for å investere i konsernet. Dette sikrar oss soliditet og kraft til å gå laus på nye, framtidsretta prosjekt. No har vi fått på plass samfunnsengasjerte og dyktige eigarar med eit langsiktig industrielt perspektiv, seier Rasmussen.
– Sikrar nye arbeidsplassar
Det nye investeringsfellesskapet går inn med totalt 300 millionar kroner i ny kapital i Klevenkonsernet.
– Dette vil sikre nye arbeidsplassar og vidare vekst både ved Kleven-verfta og for norsk verftsindustri, seier Hurtigruten sin konsernsjef Daniel Skjeldam.
Hurtigruten har tidlegare bestilt det som blir beskrive som verdas mest miljøvenlege ekspedisjonsskip – hybriddrivne MS Roald Amundsen og MS Fridtjof Nansen – hos Kleven. I denne kontrakta ligg også ein opsjon for ytterlegare to ekspedisjonsskip av same type.
– Med Kleven som eit av dei fremste eksempla, er norsk verftsindustri i verdsklasse. No går vi saman for å vidareutvikle den unike kompetansen, sikre nye lokale arbeidsplassar og skape vekst i konsernet som bygger framtidas skip, seier Skjeldam.
Petter Stordalen
Hurtigruten er nesten heileigd av det britiske forvaltningsselskapet TDR. Kor mykje pengar Hurtigruten-eigar Petter Stordalen og hans investeringsselskap Strawberry Equity går inn med i Kleven er ikkje kjend.
– Klevenkonsernet har, i likskap med andre norske verft, fått merke nedturen i olje- og offshoresektoren, men kompetansen til dei tilsette og Kleven-familien er botnsolid. Vi gler oss over å kunne bidra inn i eit nytt, spanande kapittel for Kleven, seier investor og Hurtigruten-eigar Petter A. Stordalen.
Må låne penger av ansatte
Det var eit konstruksjonsskip som skulle til eit malaysisk reiarlag som utløyste dei økonomiske problema ved Kleven, etter at reiarlaget ikkje var i stand til å ta ut den kostbare båten.