Det som får Goksøyr til å kome med utspelet er forslaget om å leggje ned Ørsta-kontoret til Statens lånekasse for utdanning.
– Vi har vore altfor passive og puslete. Heile regionen må på bana, og kjempe for kvarandre, for det kjem heile regionen til gode om Lånekassa har kontor i Ørsta. Vi må vere rause med kvarandre, slik Sunnmøre har vore vi har kjempa for at Nordmøre skulle få nye arbeidsplassar i politietaten, seier Arnulf Goksøyr.
– Kan sentralisere til Ørsta
Lånekassa må rasjonalisere, og det går ut over kontor i distrikta.
– Kvifor skal staten stimulere til ytterlegare vekst i Oslo, der det er stort press på bu- og arbeidsmarknaden, når vi har alt som skal til i distrikta? I staden kan ein sentralisere til Ørsta, for Lånekassa sin del, og dermed redusere trykket på hovudstaden, seier Goksøyr.
I denne omgangen gjeld det Statens lånekasse for utdanning. Nesten gong gjeld det kanskje ein annan statleg etat.
– Underernærte på statlege arbeidsplassar
– Vi er underernærte på statlege arbeidsplassar i vår region, samstundes som vi har stor verdiskaping som kjem heile landet til gode. Vi har kompetansen, og vi kan leggje til rette for vekst, seier Arnulf Goksøyr.
Samstundes er det klart at Sunnmøre regionråd kjem sterkare på bana. Onsdag ettermiddag skal regionrådet møte Mørebenken for å diskutere kva som kan gjerast for å hindre nedlegging
– Lånekassa sitt vedtak om å legge ned Ørsta regionkontor har klare regionalpolitiske dimensjonar som det ikkje har blitt tatt omsyn til i omorganiseringsprosessen.
Sunnmøre regionråd støttar Ørsta kommune sitt arbeid med å vidareutvikle regionkontoret i Ørsta, og vil møte stortingspolitikarane på Mørebenken til rådslaging om vidare prosess, skriv Sunnmøre regionråd i ei pressemelding.