Samla kulturtoppane i Geiranger

Fleire prominente gjestar var i Geiranger laurdag for å feire tildelinga av Europas kulturminnepris/Europa Nostra til Storfjordens Venner.
Nyheter

Foreininga vart overrekt prisen, som dei fekk i klassen «spesiell innsats» på ein seremoni i Madrid 24. mai i år. Men etter oppfordring frå Europa Nostra, har Storfjordens Venner i dag invitert til lokal feiring.

Gjekk i land på fjordgard

Feiringa tok til allereie i føremiddag. Då var fleire av gjestane på båttur i Geirangerfjorden. I programmet var også ei ilandstiging til fjordgarden i Matvika.

Prosjektleiar i Storfjordens Venner, Odd Normann Hoff, var guide på turen.

- Vi hadde ei regnbye på veg ut, elles har det vore ein fin tur, fortalde han.

Gjestane fekk servert lokal spekemat, sveler og kaffi i løa.

Vi vart også fortalt at det var så mange som ville vere med, at dei rett og slett måtte få tak i ein ekstra båt.

Prominente gjestar

I forkant av arrangementet kunne styreleiar i Storfjordens Venner, Kjell Løseth, fortelje at det er oppimot 100 namn på gjestelista.

Medan den velkjente tenoren Plácido Domingo, som er president i Europa Nostra, var forhindra i å ta turen, er generalsekretær i organisasjonen Sneska Quaedvlieg-Mihailovic, til stades.

Også med på feiringa i Geiranger er fylkesmann Lodve Solholm, fylkesvaraordførar Gunn Berit Gjerde, assisterande fylkesrådmann Willy Loftheim, fylkeskultursjef Heidi-Iren Wedlog Olsen og ordførarane frå kommunane Stranda, Sykkylven og Stordal. Ordføraren i Norddal, Arne Sandnes, er på ferie, men også hans kommune er representert ved varaordførar Per Magnus Berdal.

Fleire av dei aktive medlemmane i Storfjordens Venner er også sjølvskrivne gjestar.

Heidra innsatsen

Etter fjordturen, og ei aldri så lita kaffipause, var det duka for eit fagleg program i Norsk Fjordsenter.

På talarstolen var blant andre styreleiar i Norsk Kulturarv, og tidlegare Stortingspresident, Kirsti Kolle Grøndahl.

Ho rosa Storfjordens Venner for deira bruk av ein skrivemåte som er trufast mot den norske kulturarven, og trakk fram Ytste Skotet som eit symbol på innsatsen.

- Garden er eit eineståande eksempel på kulturarv som er gjort tilgjengeleg for folk, i den grad ein gard på ei fjellhylle 220 meter over fjorden kan kallast tilgjengeleg, sa Kolle Grøndahl.

Ho skildra gjenoppbygginga av Ytste Skotet, som var forfallen då Storfjordens arva den frå sin tidlegare eigar i 1989, som forbilledleg og godt dokumentert.

Takka for prisen

Også på talarstolen var Erik Schulz, rådsmedlem i Europa Nostra og styreleiar av Europa Nostra Norge. Han fortalde om publikasjonen «Kulturarven er verdifull for Europa», som organisasjonen gav ut i fjor. Direktør Erik Lillebråten, fortalde om arbeidet dei gjer i Norsk Kulturarv.

Katrin Blomvik, som er direktør i Stiftinga Geirangerfjorden Verdsarv, ønskte velkomen og gav ein spesiell takk til delegatane frå Europa Nostra.

- Takk til Europa, som har gitt denne prisen til noko som ligg så nærme hjarta våre, sa ho, og inviterte gjestane på ei omvising i fjordsenteret.

Seinare i kveld er det middag og markering Hotel Union.

Avslutning av det offisielle programmet, er først i morgon, søndag. Då er gjestane inviterte til å vere med på ein tur til Skageflå – vel og merke viss vêret tillèt det.