Rådmannen fekk ikkje gjennomslag for sitt forslag, då saka var handsama i kommunestyret sist torsdag. Rådmannen meinte det var naudsynt å innføre slik skatt for å halde oppe tilboda for innbyggjarane.

Bakgrunn: Nordvestlandet skygger unna eiendomsskatt

Spaning

Det knytte seg på førehand ei viss spaning til om t.d. Kristeleg Folkeparti ville røyste for å innføre denne skatten og dermed saman med t.d. Ap og Senterpartiet utgjere eit fleirtal i kommunestyret. Korkje KrF, Sp eller Ap gjekk inn for rådmannen sitt forslag.

– Vi held fast på valløfta våre. Vi går ikkje inn for eigedomsskatt, sa Randi Walderhaug Frisvoll i starten av handsaminga av saka. Ho grunngav dette mellom anna med den vanskelege situasjonen næringslivet er i for tida.

Kan velte lasset

– Nokre hjørnesteinsverksemder slit, og for utanlandske eigarar kan dette i verste fall bli ei tue som veltar heile lasset, sa Walderhaug Frisvoll (KrF).

Ordførar Vebjørn Krogsæter (Sp) slo fast at ingen er for eigedomsskatt, men kommunen har utfordringar når det gjeld tenestetilboda.

– Dette vert enda tydelegare når vi kjem til økonomiplanen til våren. Det er ikkje berekraftig å halde fram som no, meinte ordføraren, som oppmoda dei politiske partia til å stå samla om dei utfordringane som kjem.

Einaste kommune som endrar: Vestnes doblar eigedomsskatten

– Eigedomsskatt er ein måte å løyse det på, sa Krogsæter, som likevel ikkje ville gå inn for dette i 2017.

Svein Harsjøen (Frp) som har tolka t.d. KrF si haldning dit at dei er for eigedomsskatt, bad om orsaking for mistydinga.

Deretter kom den eine etter den andre på talarstolen og gav til kjenne sine syn på saka.

Skatt i Ålesund

Kristian Stråmyr (V) støtta KrF, og meinte det ville vere negativt for inntektsgrunnlaget for kommunen om ein innførte eigedomsskatt.

Også Arbeidarpartiet hang seg på bølgja av skattemotstandarar, om enn noko nølande.

Dermed seier politikarane i Haram nei til ti millionar kroner som dei truleg kunne få inn på ekstraskatten og betre dei offentlege tenestene litt meir.