På Sunnmøre har det no kome godt med snø mange stader.

- Det har kome gode 50 cm snø i natt, seier Stian Græsdal ved Strandafjellet Skisenter.

- Snømålinga som skipatruljen gjorde viste 55 cm nysnø i løpet av natta, seier Græsdal.

Frå Stordal melder Kristian Almås om 65 cm puddersnø.

- Rundt 40 cm av dette har kome i natt, seier Almås.

Ørskogfjellet utset opninga

Også på Ørskogfjellet har dei no endeleg fått nok snø, men opninga av skitrekket blir likevel utsett. Seint fredag kveld var det framleis for lite snø, melder skisenteret på si nettside.

Skredfare

– Liten kuling og forholdsvis tunge snøbyger har gitt fokksnø- og nysnøflak i leområde. Med synkande temperatur vil stabiliseringa av flaka ta lenger tid. Snøskredfaren er vurdert til 3 – betydeleg, melder Varsom.no om Nordvestlandet.

Fv 655 Norangsdalen mellom Fivelstad - Skylstad er stengt på grunn av rasfaren, opplyser Statens vegvesen.

Tung snø var truleg grunnen til straumbrot på strekket Vartdal - Standal - Trandal natt til laurdag, melder Mørenett. Også i Rauma har dei hatt straumbrot i natt.