Aasbakkane Garasjebryggeri i Sykkylven, Trollbryggeriet i Liabygda og Baatbryggeriet i Vestnes henta alle heim prisar frå ølfestivalen på Stranda sist helg.
– Det var jo heilt fantastisk at dei lokale bryggarane skulle gjere det så godt, seier festivalgeneral Anders Adolfsson.
Første gong
Stranda Porter & Stoutfestival, festivalen for mørkt øl, vart i helga arrangert for første gong.
Festivalen fann stad i Storfjord Kulturhus og på Stranda Hotell.
Anders Adolfsson, til vanleg kjøkensjef på Stranda Hotell, seier at det blir ein ny festival i oktober neste år.
Brygger øl med smak frå Nordvestlandet
– Alle bryggeria er positive til ein ny festival neste år. Så Stranda Porter & Stoutfestival er komen for å bli, slår han fast.
Rett nok kom det litt færre besøkande enn han hadde håpa på, 400 i løpet av dei tre dagane festivalen gjekk føre seg.
– Men stemninga var god, utstillarane var godt nøgde og eg har fått mange gode tilbakemeldingar, seier Adolfsson.
Sykkylven
I klassa for heimebryggarar vann Aasbakkane Garasjebryggeri frå Sykkylven førstepris for sitt «Modern Porter» i kategorien Moderne Stout/Porter.
Dei same bryggarane vann også publikumsprisen.
Opnar ølpub i siloen
I same klasse fekk Per Arne Nonsvik, utflytta skodjebygdar, førstepris i kategorien Porter.
I klassa for kommersielle bryggeri vart det også prisar til Nordvestlandet:
Baatbryggeriet i Vestnes med sitt øl «Nygle», vann førsteprisen i kategorien «Stout», medan Trollbryggeriet i Liabygda vann publikumsprisen for sin «Slogen Porter».
– At dei to lokale bryggeria hevda seg så bra i konkurranse med mange, større kommersielle bryggeri, synest eg er svært gledeleg, legg festivalsjef Anders Adolfsson til.
Under festivalen på Stranda i helga var det også tid til anna enn å smake på øl.
Det var fleire seminar og kåseri, boklansering, utflukter og bryggeribesøk, og festivalpub.