Men Avinor seier blankt nei:
– Vi bruker bokmål på flyplassar med nasjonalt eller internasjonalt tenesteområde, slik som Vigra. Så her blir det framleis bokmål, seier kommunikasjonsrådgjevar Lasse Vangstein i Avinor.
Nasjonale lufthamner skal etter deira syn nytte bokmål fordi det gjer fleirtalet i Norge.
Det er altså Språkrådet som har teke opp saka.
Dei viser til at Ålesund lufthavn ligg i nynorskkommunen Giske, i ein region der alle kommunar utanom Ålesund er nynorskkommunar.
Ålesund har definert seg sjølv som språknøytral.
– Etter Språkrådets vurdering er det heva over all tvil at lufthamna må reknast for å ha nynorsk som tenestemål. Det inneber at norskspråkleg skilting og anna skriftleg informasjonstilfang, medrekna nettsider, med tilknyting til lufthamna, skal vere på nynorsk, skriv Språkrådet i eit brev til Avinor.
Full støtte
Og dei blir heia fram av Noregs Mållag:
– Vi gir full støtte til Språkrådet, seier mållagsleiar Magne Aasbrenn.
– Avinor må gå i seg sjølv og rette opp lovtolkingane slik at norske lufthamner kan få teksting som følgjer offisiell norsk språkpolitikk. Bokmål og nynorsk er likestilte i dette landet, og det er svært viktig at også nynorskskrivande får møte språket sitt i offentleg skilting, legg Aasbrenn til.
Han seier til Sunnmørsposten at dei 600.000 som dagleg nyttar nynorsk har rett til å få sjå dette skriftspråket i bruk i kvardagslivet.
Giske vil ha nynorsk
Ordførar Harry Valderhaug (KrF) i nynorskkommunen Giske nyttar sjølv nynorsk når han skriv.
– Ettersom flyplassen ligg i ein nynorskkommune, hadde eg helst sett at det vart nytta nynorsk på flyplassen, også, seier Valderhaug.
– Bortsett frå Ålesund, som er språknøytrale, så er det vel nynorsk som blir nytta i alle kommunane rundt oss, legg Harry Valderhaug til.
Men nye skilt er ikkje på veg:
– Eg held meg til det Avinor sentralt vedtek. Vi byter ikkje ut skilt på ordre frå Språkrådet, seier lufthamnsjef Tor Hånde.
– Ville ei utskifting av skilta bli omfattande?
– Ja, det er svært mange skilt, både inne og ute, så då er det snakk om ein kostnad på fleire hundre tusen kroner, svarer lufthamnsjefen.