– Dette er «Rolls-Royce» innan rogn, smiler Rune Hoddevik i Pelagia Liavåg i Hjørungavåg.
I store kar ligg rogna til avrenning. Bilde frå sjølve produksjonen får vi ikkje ta. Men pakkinga får vi sjå.
– Med rett kvalitet er dette ei delikatesse i Austen, fortel fabrikksjefen.
Resten av fisken går til mjøl og olje.
Utestengt frå Island
Norske båtar får fiske lodde i islandsk sone – men ikkje når det er sesong for rogn.
Vi har også lodda i Barentshavet, men der er kvoten veldig ustabil. Sist det vart produsert lodderogn i noko særleg kvantum her i Norge var i 2013.
Det er altså i norsk samanheng ei sjeldan matvare som i desse dagar blir klargjort og pakka ved Pelagia Liavåg, i ein kort og hektisk sesong.
Pelagia dominerer
På Island er årets produksjon mindre enn normalt, ifølgje Norges Sildesalgslag.
– Det er islendingane som er førande når det gjeld lodderogn. Men så vidt eg kjenner til, er det i år produsert mindre rogn enn eit normalår på Island. Dermed kan det bli ei underdekning og gode prisar i marknaden, men det vil jo tida vise, seier Kenneth Garvik i Sildelaget.
Her på Nordvestlandet har også Midsund-båten «Nybo» anlegg til å presse og prosessere lodderogn, men det er Pelagia som er dominerande i Norge.
Kaldt vatn
Fabrikksjef Hoddevik vil helle kaldt vatn i blodet på dei som tenker at lodderogn er raske og enkle pengar.
– Dette er eit svært risikabelt produkt med tanke på omsetning, pris og kvalitet. Resultatet av denne produksjonen vil først vise seg etter mange inspeksjonar i lang tid framover, understrekar han.
Hoddevik trur likevel at det er ein veksande marknad. Frå før har dei også tilverking av silderogn.
– Silderogn er sikkert eit produkt som vil ta seg opp, både til medisinsk bruk og til omega-produksjon, og som delikatesse, seier Hoddevik.