Eit strålande vêrvarsel gjer at dei kanskje kjem tilbake i påska. Skianlegga rundt om på Nordvestlandet kan iallfall lokke med fine forhold:
– Vi er klare som eit egg, seier dagleg leiar Rune Støversten ved Arena Overøye. Både i Stordal og ved dei andre skisentera er dei over seg av begeistring for vêrvarselet i påska.
Slik blir påskeværet
Men allereie før sjølve påskehelga varslar fleire av skianlegga at dette vi no snart har lagt bak oss blir ein kjempebra sesong.
– Dette er bortimot det beste vi nokon gong har opplevd. Og no går vi mot ei draumepåske, seier ein oppglødd Tore Utgård, styreleiar i Sunnmørsalpane Skiarena Fjellsetra i Sykkylven.
Beste sesong
Draumepåske håpar også ekteparet Magnhild og Inge Krumsvik på:
– Vi står vanlegvis på ski i Volda Skisenter. Men no har vi besøk, og hadde lyst på prøve anlegget her. Tidlegare har vi berre gått på langrennsski i Hornindal, fortel paret.
Dei har stått ein god del på alpinski opp gjennom åra, og har prøvd bakkar i inn- og utland.
– Eg vil gje dette anlegget i Hornindal terningkast fem, seier Inge Krumsvik.
Ikkje langt unna møter vi på Leif Gausemel, assisterande driftsleiar ved Hornindal Skisenter:
– Dette blir vår aller beste sesong, med over 80 driftsdagar. No er vi klare for påska, og vi trur at langfredag vil bli den mest hektiske dagen.
– Heilt anna enn i fjor
Det er ikkje berre han som no stålset seg til nokre hektiske påskedagar i solskinet. Frank Welle, dagleg leiar ved Ørsta Skisenter, fortel om mykje snø i heile anlegget.
– Korleis blir denne sesongen, om du skal summere opp allereie no?
– Det blir eit bra år, sjølv om vi ikkje har tal enno. Det vert iallfall ein heilt, heilt annan vinter enn i fjor, seier Welle.
– Beste vinteren på lenge, svarer driftsleiar Øyvind Flåskjær ved Volda skisenter, når vi spør han om det same.
– Vi opna 21. november, og har halde ope sidan, med nokre få unntak, legg han til.
– Her kan det gå mot rekord, seier Tommy Røynstad på Ørskogfjellet Skisenter – og har ikkje tid til å seie stort meir. For han skal selje billettar.