– Dette har vore ei heilt fantastisk helg. Og vi har berre fått positive tilbakemeldingar på arrangementet vårt.
Det seier Hallgeir Hove, kulturkonsulent i Stordal og dagleg leiar av Stordalshallen.
Framleis UKM
Det som før heitte Ungdommens kulturmønstring har no skifta namn til Ung kultur møtast. Dermed kunne ein behalde forkortinga UKM.
I løpet av helga fekk ungdomane vise fram kva dei kan innan song, musikk, dans, film og visuelle uttrykk som bilete, fotografi og skulptur.
I hall og bedehus
Det meste fann stad i Stordalshallen, medan kunsten vart vist fram på bedehuset, som for anledninga var gjort om til eit galleri.
– Denne helga har vi verkeleg fått stadfesta at det er mykje flott ungdom i Møre og Romsdal som er svært flinke i tillegg, meiner Hallgeir Hove.
Han fortel at alt gjekk etter planen med det store og omfattande arrangementet, både når det gjeld det scena, overnattinga og maten.
Då Sunnmørsposten snakka med Hove seint i går ettermiddag var han i full gang med oppryddinga.
Maurtue
– Det er mange som hjelper til. Ja, det ser ut som ei maurtue her no.
– Det er ein god følelse at vi har gjennomført dette arrangementet på ein skikkeleg måte. Så no er det lov å vere litt slitne, legg han til.