Mange bedrifter på Nordvestlandet har fått støtte i sitt arbeid med forsking og innovasjon. Men truleg er det mange som framleis synest det kan vere vanskeleg å orientere seg. Rådgjevar Øyvind Herse i Møre og Romsdal fylkeskommune jobbar med å auke innovasjon som er knytt til forsking, og ifølgje han er trenden aukande.

– Statistikken viser at Møre og Romsdal har ein bra vekst i bruken av forskingsrådet sine midlar. Frå 2016 til 2017 var det mellom anna ni prosent auke i bruken av midlar frå Skattefunn-ordninga, noko som er ein god indikator på at det er god giv i innovasjonsarbeidet, seier han.

Kompetansemeklarar

Utpeika personar kalla kompetansemeklarar skal hjelpe bedrifter og offentlege verksemder med å utvikle prosjekt som kan få økonomisk tilskot frå Norges Forskningsråd, eller andre delar av verkemiddelapparatet. No har også fleire av Ålesund kunnskapspark (ÅKP) sine tilsette fått ei slik rolle. Ein av desse er Robert Voldnes, som er leiar for ÅKP-kontoret i Ulsteinvik. Han har hjelpt både nye og etablerte bedrifter på Søre Sunnmøre med å utvikle nye idear i møte med nedgangen dei siste åra.

Alt frå verksemder som Offshore Simulator Centre og Runde Miljøsenter, til mindre gründerverksemder er mellom dei som har fått støtte i hans område.

– Det er sikkert mange verksemder på Sunnmøre med behov for omstilling og innovasjon som ikkje er merksame på at dei kan få assistanse og økonomiske tilskot for å gjennomføre prosjekt, seier han.

Trekk fram to ordningar

Voldnes har fleire tips for bedrifter som ønskjer å knyte seg til forskarar i sitt arbeid med nyskaping.

– Det er særleg to ordningar som eignar seg godt for utolmodige verksemder som skal til med aktivitetar innan forsking- og utvikling, ifølgje Voldnes.

Det eine er kalla Forregion – som svarar til den tidlegare Vri-ordninga. Her kan ein få opptil 200.000 kroner i støtte til forprosjekt. Frå ordninga for fylke med «særskildt» omstillingsbehov kan ein få støtte på opptil 800.000 kr for samarbeidsprosjekt med forskarar.