Tussa-konsernet fekk redusert driftsresultatetet med 40,8 millionar kroner i 1. tertial, samanlikna med same periode i fjor, ifølgje tertialrapporten konsernet har sendt Oslo Børs.

Hovudårsaka er lågare produksjonsvolum og at andre driftskostnader er høgare, som følgje av rehabilitering og oppgradering av turbinane i Tussa kraftverk på Bjørke.

Ikkje tap på årsbasis

Anlegget på Bjørke er Tussa sitt største kraftverk, og det har vore ute av drift i to månader i 1. tertial. Driftsstansen var planlagd.

Kraftproduksjonen dei første månadene av året var om lag 65 prosent av normalproduksjonen for perioden.

Tussa-konsernet reknar ikkje med at det blir tapte inntekter på årsbasis som følgje av driftstansen.

Ventar auka produksjon

Det er venta at oppgraderinga vil gi auka produksjon, men at ein ikkje får full effekt av oppgraderinga før linjenettet i området også er oppgradert.

Konsernet skriv elles at vassmagasina i Norden er under normalen for årstida. Snømagasina var over det normale stort sett heile vinteren, men ved utgangen av tertialet var dei tilbake til normalen.

Positivt for IKT

Rekneskapen for 1. tertial syner eit driftsresultat på 29,8 millionar kroner (70,6 millionar på same tid i fjor). Resultat før skatt var på 29 millionar kroner (55,8 millionar).

Omsetninga vart 309,2 millionar kroner (298 millionar).

Nettverksemda er største bidragsytar til resultatet. Tussa IKT har hatt positiv resultatutvikling, medan Tussa-24 og Tussa Installasjon viser lågare resultat samanlikna med i fjor.