Hallstein Vemøy har vore distriktsredaktør i NRK Møre og Romsdal i 13 år. Før det var han redaksjonsleiar i fem år i NRK Hordaland med ansvar for nyheitsområdet.
NRK skriv i ei pressemelding tysdag at han i løpet av hausten jobbe med utviklingsprosjekt for NRK-avdelingane i Midt-Noreg og for Distriktsdivisjonen i NRK. Vemøy blir i stillinga inntil erstattar er på plass, og skal ha base i Ålesund når han tek fatt på prosjektoppgåver for NRK seinare i haust.
Kjem til å sakne Vemøy
Regionredaktør Sigrid Gjellan seier følgjande om Vemøy:
– Hallstein er ein dyktig leiar som har stått i bresjen for utvikling og kvalitet gjennom mange år. Det siste året har kontoret under hans leiing løfta det digitale nyheitsoppdraget på ein imponerande måte. NRK Møre og Romsdal var viktig for gjennomføringa av det store dugnadsprosjektet i NRK i vår, der heile landet blei med i ein stor ryddeaksjon. Vemøy har både i dette prosjektet og andre tatt initiativ til samarbeid på tvers mellom avdelingar i NRK eller mellom NRK og dei andre mediehusa i Møre og Romsdal. Eg kjem til å sakne han i leiargruppa mi, men det er lov å gi seg på topp, seier ho.
Krevjande omstillingar
Vemøy seier at det no er på tide med noko nytt:
– Eg kjenner meg privilegert som har fått jobba med så mange dyktige folk og spennande utfordringar opp gjennom åra. Jobben som distriktsredaktør er svært mangfaldig og eg er imponert over korleis medarbeidarane mine har tatt dei krevjande omstillingane digitalskiftet har bydd på for mediebransjen desse åra. Og så er eg veldig stolt over at vi i ein kvardag der folk kan ta alle moglege kanalar og tilbod inn på mobilen sin, har greidd å halde ein solid posisjon på radio og tv i fylket, samstundes som vi når stadig fleire på nett og mobil. Etter 13 år følte eg det var rett med noko nytt både for eigen del og for redaksjonen, og er veldig glad for at eg framover skal få bruke erfaringa mi i ulike prosjekt for å utvikle NRK vidare, seier Hallstein Vemøy i pressemeldinga.