Den gamle rådhustomta på Sjøholt får 26 leilegheiter, dersom utbyggjaren K & S Stavseng får det som dei vil.
– Vi har presentert planane for kommunen. Det neste blir å byggemelde prosjektet og sende ut nabovarsel, seier Sturla Stavseng til Bygdebladet, som skreiv om saka først.
Reint praktisk blir det nødvendig å bygge den fire etasjes bustadblokka først. Her er det planar om 18 leilegheiter, og næringslokale på gateplanet, tett opp til bankplassen.
– Vi har lyst til å skape meir aktivitet ut mot bankplassen. Det er på bankplsasen det skjer, anten det er 17. mai, bluesfestival eller Ørskog-dagar. Vi tenker kanskje på å få inn småbutikkar og ein kafé, kanskje også anna næring, seier Stavseng til Sunnmørsposten.
Bak blokka er det planar om einebustader på rekker, totalt åtte bustader,
– Vi er avhengig av sal før vi kan setje i gang bygging. Og sjølvsagt er vi avhengig av at det blir godkjend, understrekar han. Ifølgje Stavseng er det rundt 10 personar som har meldt interesse.
Ålesund kjem nærare
– Vi er i alle fall veldig positive til prosjektet, og at det skjer utvikling i Sjøholt sentrum. Vi ser også at Ålesund kryp nærare og nærare, seier Liv Marit Nystad i Ørskog kommune.
Frå 2020 blir Ørskog etter alt å døme ein del av nye Ålesund kommune. Dette har faktisk betydning for at K & S Stavseng satsar på denne store utbygginga.
– Om Ørskog i staden hadde blitt del av ein landkommune, så er det ikkje sikkert at vi hadde turt oss på prosjektet, seier Sturla Stavseng til Sunnmørsposten.
Han meiner Sjøholt blir meir attraktivt når dei blir ein del av bykommunen.
– Sjøholt blir meir attraktiv for tilflytting. Det er positivt for prisutvikling på bustader og tomter, meiner Stavseng.
Fleire utbyggingar vil kome
I tida som kjem er det venta fleire utbyggingar i Sjøholt sentrum. Den gamle rådhustomta låg på utsida av den gamle grensa med byggeforbod, og hadde derfor blitt utbygd uansett.
Lenger ned mot sjøen har det vore byggeforbod på grunn av rasfare frå Åknes/Tafjord. I fjor vart dette byggeforbodet oppheva.
