Studentane som går ut frå Fagskolen i Ålesund går inn i fast arbeid etter kort tid. Dette viser skulen sine eigne undersøkingar. Eitt år etter at ungdomane har avslutta utdanninga, spør skulen om korleis det gjekk med dei.
Så å seie alle er i arbeid på det området dei utdanna seg til. Det kan vere ein eller to av årskullet som ikkje er i arbeid, og det kan ha mange årsaker.
Tyskland har ei omfattande utdanning på slike yrkeshøgskular. Men fagskulen slit med å få fram fordelane med denne utdanninga, og dei slit med å få nok driftsmiddel frå fylkeskommunen som eig skulen.
Dei fleste elevane på landsida kjem frå Vg1 og 2, læretid og fagbrev. Mindretalet har fem års realkompetanse. Dei som vel sjøsida har fagbrev og fartstid.
– Like viktig som høgskulen
Styrken til dei som kjem ut frå fagskulen er at dei veit av eiga erfaring korleis ting verkar, og dei har den teoretiske kunnskapen.
– Fagskulen er like viktig som høgskulen. Om fem til 10 år er nok statusen til fagskulen heilt annleis enn i dag, sa Arnfinn Ingjerd i Maritimt Forum Nordvest på Fagskulekonferansen måndag.
– Industrien må ha folk som har praktisk innsikt. Vi har ikkje greidd å få bodskapen ut, sa Tor Rønnestad frå Jets.
Les fleire næringslivsnyheiter på smp.no
Næringslivet vil at skulen har godt utstyr. Når det offentlege stiller med bygningar, løner og faste kostnader, kan private sjå kva ein får til.
– Fagskulen er ein av dei viktige utdanningane, sa Stig Bjørkedal frå Vard. Medan det er raskt og billeg å utdanne ein ingeniør i skulesystemet, er utdanninga av folk gjennom erfaring, både langsiktig, dyrt og arbeidskrevjande.
Slik med gamalt utstyrt
Fagskulen slit med til dels gamalt utstyr, men fleire sa at bedrifter vil låne ut nye maskiner til skulen.
– Når vi som studentar vert kjent med spesielle produkt på skulen, kan det lett skje at vi kjøper det same neste gong vi byggjer ny fiskebåt, sa ein av elevane.
Deltakarar på konferansen kritiserte at verken folk frå fylkeskommunen eller Mørebenken hadde funne det bryet verdt å møte fram, og det vart antyda at det rette kan vere å knyte sterkare band mellom skulen og næringslivet.