– Vi har ferje og vi har mannskap. Og vi har ledig kapasitet i sommar, seier Øyvind Sørsten, styreleiar i ferjelaget «Skånevik».
Det er berre eitt men: Ferjelaget må ha ein garanti på ein million kroner før dei tek på seg jobben.
– Men vi har forstått det slik at omsetninga truleg blir så høg at vi får dekt driftsutgiftene våre, legg styreleiaren til.
– Og det hastar med å få avklart garantispørsmålet, fordi vi må planlegge årets sesong, forklarer Øyvind Sørsten, som sjølv er maskinist på ferja.
La ned
Det var i fjor at Fjord1 bestemte seg for å leggje ned turistruta mellom Valldal og Geiranger, ei rute som har gått kvar sommar i fleire år.
Staten bygde i 1937 turistferja «Geiranger» og oppretta ruta Valldal–Geiranger. Her gjekk det ferje fram til 1969. Sommaren 2003 kom ruta i gang att, i eit samarbeid mellom Fjord 1 og Valldal Kailag. Men i fjor hadde Fjord1 fått nok, etter fleire år med underskot – sjølv om trafikken var aukande. Sidan har Valldal Kailag arbeidd med å finne private som kunne ta over.
– Vi har snakka med fleire interesserte, og det finst ledige ferjer. Men det står altså på kapital, seier Merete Myklebust, leiar i Valldal Kailag.
Laget meiner det er viktig for næringslivet i Valldal at det også komande sommar går ei ferje mellom Valldal og Geiranger. Ei ferje skaper liv og røre i ei bygd, meiner dei.
Ulstein
Og liv og røre vil ferjelaget «Skånevik» gjerne lage:
– Vi har ferja «Skånevik», bygd ved Ulstein Mek. Verksted i 1967. Skipet er freda av Riksantikvaren, fortel Øyvind Sørsten.
«Skånevik» vart bygd for Hardanger Sunnhordlandske Dampskipsselskap (HSD) i Bergen. Ferja har salong med utsikt, og promenadedekk bak.
Ferja trafikkerte dei fleste strekningane til HSD, før ho vart pensjonert og seld til Stiftinga Brørvikskuto i Bergen i 2004. Året etter vart ferja overført til dei noverande eigarane. Ferjelaget «Skånevik» vart skipa for å verne og halde ved like ferja.