Ein mann ligg livstrugande skadd på St. Olavs Hospital i Trondheim, etter å ha blitt slått fleire gongar i hovudet med ei flaske, natt til tysdag.
Mannen vart først frakta til Volda sjukehus.
Livstrugande hovudskadar
- Han er alvorleg skadd, og blir overflytta St. Olavs Hospital, sa vakthavande kirurg ved Volda sjukehus, Olav Brattli til smp.no, tysdag morgon.
I ei pressemelding klokka 08.30 opplyser Brattli vidare at mannen - som er i 20-åra, har hovudskadar, at skadane er livstrugande og situasjonen uavklart og ustabil.
Overflyttinga skjedde med ambulansehelikopter.
Sikta for lekamsskading
Når det gjeld gjerningsmannen, så er han pågripen og sit i arrest i Ålesund, fortel operasjonsleiar Johan Arnt Overøye.
- Han slo, etter å ha funne sambuaren sin i seng med mannen - som er naboen deira, seier operasjonsleiaren.
Avhøyr i løpet av dagen
Mannen som er pågripen er sikta for lekamsskading. Tysdag føremiddag hadde han framleis ikkje fått oppnemnt advokat, fortel politiadvokat Elin Anja Drønnen.
- Men han vil bli avhøyrt i løpet av dagen, og etterkvart - truleg først onsdag, vil det bli avgjort om han skal framstillast for varetektsfengsling, seier ho.
- Planen er også å starte avhøyr av vitne og å gå igang med åstedsundersøking, i løpet av tysdag, legg ho til.
Politiet fekk melding om valden klokka 04.44.