Å opprette eit eige prisområde for straum som skal eksporterast gjennom utanlandskablane, vil vere vanskeleg, men truleg ikkje umogleg, seier Arnesen til Nationen.
– Det handlar om korleis ein «snikrar» det til og grunngir modellen. Men det er ikkje umogleg, seier han.
– Klarer ein først å bestemme seg for modellen, er eg rimeleg sikker på at det er mogleg å få til noko som er innanfor EØS-retten, seier Arnesen.
Vi ramme inn kabelpunkt
Blant dei som har teke til orde for å innføre eit toprissystem for straum, er Senterpartiets energipolitiske talsperson Ole André Myhrvold.
Han seier til Dagbladet at kabelpunkta kan rammast inn som eigne prisområde. Dermed kan ein ha ein eigen straumpris innanlands som er lågare enn eksportprisen.
Ifølgje Dagbladet jobbar også regjeringa i djup løyndom med eit slikt toprissystem. Ingen opne kjelder har likevel stadfesta at eit slikt arbeid går føre seg.
– Snur alle steinar
– Vi jobbar sjølvsagt kontinuerleg med å finne løysingar på både energikrisa og straumpriskrisa, vi snur alle steinar. Kva spor vi til kvar tid jobbar langs vil eg ikkje kommentere utover det eg har varsla før, seier olje- og energiminister Terje Aasland til avisa.
Også Raudt vil frikople straumprisen innanlands frå europeiske kraftprisar, som i stor grad er #styr av prisen på gass. Nyleg la partiet fram eit nytt forslag i Stortinget om saka.
(©NPK)