Nyheita frå regjeringa kom fredag føremiddag.
− Etter å ha vurdert søknaden frå Ålesund, er konklusjonen at kommunen får kompensert 200 millionar kroner for kostnader ved deling, seier kommunal- og distriktsminister Sigbjørn Gjelsvik i ei pressemelding.
Ganske nøgd ordførar
Ålesund-ordførar Eva Vinje Aurdal (Ap) verkar ganske nøgd når Sunnmørsposten ringer henne rett etter beskjeden frå regjeringa kom.
– Eg ser på dette som ein aksept for prosjektrekneskapen vi har sett opp. Så det er ei anerkjenning av det administrasjonen har gjort, seier Vinje Aurdal.
– Men de ønskte 237 millionar kroner og ikkje 200?
– Ja, slik eg forstår det er det sikkerheitsmarginen vi ikkje har fått innfridd. Vi veit heller ikkje om det er ei moglegheit for å kome tilbake til dei om rekneskapen ikkje held. Men for å seie det slik, så er ikkje dette den dårlegaste nyheita eg har fått i dag, seier Ålesund-ordføraren.
Kommunedirektøren: – Vi har tilsette som seier opp, som ikkje orkar å stå i dette
Ho understrekar at nyheita er heilt fersk for henne og at ho heller får uttale seg grundigare seinare, men Vinje Aurdal ser for seg å kalle inn til eit ekstraordinært formannskapsmøte med det første.
Høgre-leiar i Ålesund, Monica Molvær, etterlyser dei siste 37 millionane.
– Eg skulle mykje heller ha brukt 200 millionar kroner på betre eldreomsorg og skule, enn unødvendig kommunedeling. Når vi først blir oppløyst, så skulle det berre mangle at regjeringa betaler rekninga. Framleis er det circa 40 millionar kroner for lite. Vi ventar at regjeringa plukkar opp heile rekninga, som lova.
Også Stortingsrepresentant André N. Skjelstad (Venstre) reagerer.
– Det er heilt klart at regjeringa stikk frå rekninga for sitt eige prosjekt. Med desse føresetnadane må Ålesund kommune få moglegheit til å ta stilling til saka på nytt, seier stortingsrepresentanten.
Fråtrekk for usikkerheitspåslag
Kommunal- og distriktsminister Sigbjørn Gjelsvik seier det er gjort ei heilskapleg vurdering av søknaden, og mellom anna gjort fråtrekk for usikkerheitspåslag, som er utanfor kriteria for ordninga.
Departementet vil i det formelle tilsegnsbrevet krevje rapportering og ei stadfesting frå revisor innan ein gitt frist, for å sikre at bruken samsvarar med innhaldet i søknaden og er i tråd med formålet for løyvinga, heiter det i pressemeldinga.
− Det er vanleg med rapportering og etterkontroll ved utbetaling av midlar slik at vi kan vere sikre på at midlane blir brukte i tråd med formålet for ordninga, seier Gjelsvik.
Dei tvangssamanslåtte fylka ventar framleis svar på sine søknader, og ifølgje departementet er svara rett rundt hjørnet.
Ålesund kommune har mens ein venta på svaret på søknaden vore i ein fortvila situasjon. Under førre formannskapsmøte fortalde kommunedirektør Steven Hasseldal at fleire tilsette har sagt opp som ein direkte konsekvens av dette. Han var onsdag denne veka i møte med departementet.
Politikarane har frykta å måtte vedta eit nytt budsjett med store kutt i skule og eldreomsorg. Uvissa rundt kor mykje ein ville få dekt har ført til politiske vedtak om å be Stortinget stoppe heile prosessen med skilsmissa dersom ikkje oppdelinga blei dekt av regjeringa.