Det seier ordførar Stein Aam. Ørsta kommune har vedteke eit låneopptak i 2016 på 143 millionar, og beløpet er inkludert startlån på tre millionar.
Resten av låneopptaket på 140 millionar med fire års løpetid har vore på anbod. Det lågaste tilbodet krev at lånet må noterast på Oslo Børs.
Det medfører at lånet blir offentleg, og delrapportar og årsrapportar må publiserast på heimesida til kommunen.
Ingen risiko
Rådmann i Ørsta kommune, Wenche Solheim, seier at det er ein vanskeleg marknad og kommunen må fordele risiko ved å ta opp ulike lån, utan å betale for mykje.
Gjer som meir enn 30.000 andre - følg smp.no på Facebook!
Solheim ser ikkje noko risiko med børsnotert lån, og seier at det er ein vanleg måte å få tak i lån på.
– No har vi teke opp eit lån med fire års fastrente, og er berre forplikta i dei åra. Så blir det ei ny runde med nye anbod, seier Solheim.
– Ørsta kommune kjem til å ligge tett opp mot 800 millionar kroner i lån, og vi må fordele kostnadane og skape føreseielegheit. Det er spennande også å ha lån på børs, seier Aam.
Først på Sunnmøre
Før lånet kan bli utbetalt må det godkjennast av Norsk Tillitsmann, og normalt vil det gå inntil ei veke.
Les næringslivsnyheiter på smp.no
Kommunikasjonssjef ved Oslo Børs, Geir Harald Aase, seier at i august tok Eide og Molde kommune opp børsnotert lån i Møre og Romsdal fylke, og Ørsta er nummer tre i rekkja.
Men på Sunnmøre er Ørsta først ute.
– Bankane anbefaler ofte at når ein lånar på obligasjonar, så noterer ein desse på Oslo Børs. Det gjev sikkerheit, med strengare krav til informasjon og rapportering til investorane, seier Aase.
Når kommunar lånar gjennom obligasjon, får dei låne billegare, ifølgje Aase, og Oslo Børs opplever no eit «rush» av kommunar som notarar obligasjonslån. Aase seier det speglar Ørsta kommune sitt val, når dei sparar over 600.000 kroner.
– I fjor var det berre ein handfull kommunar som hadde obligasjonslån. Per i dag har totalt 22 kommunar og tre fylkeskommunar i Norge notert lån ved Oslo Børs, og Oslo er den kommunen som har lånt mest, seier Aase.