(
) Førre laurdag var 14-åringen John-Rasmus Sætre Torheim frå Stryn på båttur saman med foreldra. John-Rasmus, som er ein ivrig naturfotograf, såg plutseleg noko som bevegde seg midt ute på fjorden då dei var på veg frå Stryn mot Loen. Då dei køyrde nærare såg dei at det var ein liten røyskatt som var på ein lengre symjetur.
– Eg trur den var på veg frå Staveneset og over fjorden. Det var mykje bølger så den såg ut til å slite med å symje, fortel John-Rasmus.
Fekk skyss
Då dei kom nærare, så snudde plutseleg røyskatten og sumde mot båten. Før dei visste ordet av det var han komen seg om bord bak ved motoren.
– Vi vart ganske overraska då røyskatten plutseleg var i båten. Han verka ikkje særleg redd og gjekk litt fram og tilbake. Han kika seg litt rundt og såg litt på oss før han la seg ned mellom noko tau for å kvile seg.
Den såg ganske sliten ut og låg der til vi kom på land, fortel John-Rasmus. Han bar sjølv den firbeinte passasjeren på land då dei kom tilbake.
Dokumenterte omsynslaus RIB-køyring
Vil bli naturfotograf
– Røyskatten stakk nokre meter av garde før han snudde seg og såg på meg. Det var som om vi fekk ein slags kontakt, eg veit ikkje. Kanskje redda vi han frå å drukne, fortel John-Rasmus.
Han beskriv det heile som ei veldig spesiell oppleving. 14-åringen har nemleg ein stor interesse for foto og spesielt naturfoto. Den unge hobbyfotografen vonar å bli naturfotograf i framtida.
– Eg er mest interessert i å ta bilete av dyr, så det var ganske spesielt å få ein røyskatt om bord i båten. Dette var ei gåvepakke av dei sjeldne for oss og kanskje også for
røyskatten, skrattar John-Rasmus.