Journalist Tarjei Engeset Ofstad og kameramann Jan Erik Finsæther vart med prosjektsjef Marianne Nærø på førpremiere av Nordøyvegen.

– Eg ser veldig fram til dagen vi får opna anlegget for alle brukarane av vegen. Det er jo dei vi bygger for, seier prosjektsjef Nærø.

For Nærø har det vore ei spesiell oppleving å få arbeide med vegprosjektet frå start til slutt over dei seks siste åra.

– Fokuset no ligg på å fullføre vegen og levere med godt resultat. Ein blir stolt når ein har jobba med noko så lenge. Vi snakkar ofte om det i organisasjonen, det er «once in a lifetime» å få vere med på noko så spektakulært. Det finst ikkje mange vegar som kan måle seg med dette.

Her går Nordøyvegen - frå Skjeltene på fastlandet i sør til Harøy i nord. Den står ferdig i august 2022, men strekninga fastlandet-Lepsøy-Haramsøy blir opna for publikum 18. desember 2021. Foto: Kart: Møre og Romsdal fylkeskommune

Ho legg ikkje skjul på at dei sjølv er godt nøgde med prosjektet, som har ein prislapp på 5,6 milliardar kroner.

– Både vi og Skanska har i fleire år kalla dette for Norges mest spektakulære anleggsprosjekt.

Med det peiker ho også på demninga som har blitt bygd mellom Lauka og Hestøya. Starten på Haramsfjordtunnelen ligg nemleg sju meter under havoverflata. På utsida brukar dei asfaltvegg med eit lag av stein over for å halde vatnet ute frå tunnelinngangen.

– Det har aldri vore gjort før i vegprosjekt ute i havet, så vidt vi kjenner til. Det er ei spesiell løysing, men det har fungert bra, og så ser det bra ut i tillegg.

Filma heile vegen: Her er filmfotograf Jan Erik Finnsæther (t.v.), prosjektsjef Marianne Nærø og journalist Tarjei Engeset Ofstad 113 meter under havoverflata inne i Pumpesumpen i Haramsfjordtunnelen. Foto: Vegard Holmen

Ein million arbeidstimar

På prosjektet arbeider det folk frå heile Norge, og frå fleire andre land.

– Suksessformelen er at eg har med meg ein stor organisasjon med utruleg flinke personar som finn løysingar, og Skanska med sin organisasjon og underentreprenørar som også har rette folka på rett plass.

Nærø estimerer at det har gått med godt over ein million arbeidstimar i prosjektet.

– På ein normal arbeidsmånad blir det kring 500 personar som arbeider på anlegget. I tillegg er det mange innom og leverer varer, så det er ein ganske stor produksjon for å få det til. Vi bruker mange lokale leverandørar, og har 160 underentreprenørar. Kvar tredje tilsett er lokale.

På tur: Journalist Tarjei Engeset Ofstad og prosjektsjef Marianne Nærø kjøyrer heile vegen frå Skjeltene til Harøya i sendinga. Foto: Skjermutklipp frå sendinga

God mottaking

Nærø fortel at dei som arbeider på vegen har blitt godt mottatt av folket Nordøyane.

– Då er det kjekt å vere vegbyggar, det er vi utrulege takksame for.

I prosjektet har dei vore oppteken av å inkludere lokale nøkkelpersonar, som blant anna Oddbjørn Vatne, Eva Vinje Aurdal og Inge Huse, som har lagt siste salva i tunnelane.

Mange har vist interesse for arbeidet, som dei har delt på ei eiga Facebookside.

– Etter kvart har det blitt ei side som mange i bransjen følger også, med 20.000 innom kvar veke.

I tillegg til dei undersjøiske tunnelane, har dei bygd ein tunnel på bakkenivå med ein heilt spesiell funksjon. Hubrotunnelen skal verne om den sterkt trua uglearten hubro som bur på Burberget på Fjørtofta.

– Då får vi håpe at hubroen også er nøgde med oss.

Gjennomtenkt prosjekt

Dette var første besøk for journalist Tarjei Engeset Ofstad. Med Nordøyvegen er det godt sannsynleg at det blir fleire turar dit. Det første han vil gjere er å prøve å sykle så langt det går.

Lepsøybrua er 800 meter lang. Foto: Skjermdump frå sendinga

– Når Nordøyvegen er ferdig håper eg på eit godt kollektivtilbod, og at ålreite gong- og sykkelvegar blir prioritert der det er mogleg. Det blir fantastisk å kunne kaste kajakken på taket, og ta den med ut kor som helst. No blir det mogleg å dra på dagstur til Nordøyane ein ettermiddag, og nytte området som friluftsområde.

Det som overraska han mest, er inntrykket av kor gjennomført prosjektet er.

– Det er ikkje berre ting som er tenkt igjennom på førehand, men også undervegs. Frå rumlelinje i tunnelane til demninga som er laga, til korleis dei har handtert overflødig stein.

Med fem gopro-kamera, eit 360 kamera og mikrofon på taket, eit handhalde kamera i bilen, Kristoffer Antonsen i følgebil med drone og arkivfoto frå Fylkeskommunen, har Jan Erik Finsæther fanga vegen meter for meter. Han håper at dei har klart å formidle vegen på ein måte som gjer at folk vil ta turen.

– Eg har ikkje noko anna enn godt å seie om prosjektet, og vil påstå at han konkurrerer med Atlanterhavsvegen og andre kjente turar. Ein ting er ingeniørdelen, noko anna er den vanvitig fine naturen.