Hovedlandsrennet blir i år arrangert i Storås skisenter i Stokke og Breimyrbakken ved Holmestrand.
I fjor blei det sølv og bronse på Skodjereite. Kombinertløparen hadde trua på førehand på at det kunne bli gull i meisterskapen for dei beste 15- og 16-åringane i landet.
– Eg visste det kunne gå bra om eg fekk eit godt resultat i hoppbakken, og det skjedde, seier Skodjereite til Sunnmørsposten.
Var 54 sekund bak
Etter hopprennet låg han på tredjeplass, 54 sekund bak leiaren Fredrik Eirinsønn Villumstad.
– Eg hadde eit svakt treningshopp, så eg var skeptisk før hoppkonkurransen. Men det gjekk veldig bra i begge omgangane og det såg bra ut før langrennet, seier han.
Les fleire sportsnyheiter på smp.no
Skodjereite visste det var fullt muleg å ta igjen dei 54 sekunda.
– Eg gjekk kontrollert frå starten av og visste frå tidlegare konkurransar at det skulle gå bra. Det tok ikkje så lang tid før eg var i leiinga.
– Veldig kjekt
Han gjekk fremst etter den fyrste runden og på den andre hadde han full kontroll og gjekk åleine. Gullet var eigentleg aldri trua: – Det var veldig kjekt, seier han.
Sigrid Flo Bødal frå Stårheim kom på 5. plass i skiskyting i J16-klassa i Hovedlandsrennet.