Oppdrett eller villaks. Kan du merke forskjellen? Spørsmålet er minst like mykje diskutert i USA som i Norge. Washington Post sette saman eit panel med kokkar for å teste ut om det er sant slik laksefiskarar seier; at villaks er den beste. Resultatet vart ein knusande siger til oppdrettslaksen, som tok dei fem første plassane.
Øvst på pallen står matvarekjeda Costco sin oppdrettslaks, som er frosen i pakkar og tilsett saltlake. Det som ikkje står i avisa er at denne laksen er pakka og produsert i Syvde, Norway.
– Det er heilt rått. Her har vi knust alle storegutane i klassen, seier Roger Hofseth, som er eigar og toppsjef i Hofseth-gruppa.
Reklameeffekt
Han kjøpte det nedlagde meieriet på Syvde, og har gjort det om til ein laksefabrikk som no altså kan skilte med tittelen «best i USA».
– Dette gir ein utruleg reklameeffekt for bedrifta, og for vår kunde i USA. Vi satsar no på at alle dei 20 millionar lesarane til Washington Post kjøper ein laksepakke kvar neste veke. Då vert det travelt i Syvde!, seier Hofseth.
Han kan også gle seg på vegner av norsk laksenæring. Norsk laks er både nummer ein og nummer to.
– Vi set på plass både skottane og chilenarane, meiner Roger Hofseth.
Dei fire variantane av villaks fekk 6, 8, 9 og 10. plass. Botnplasseringane overraskar ikkje laksegründeren frå Ellingsøy.
– Villaksen i Nord-Amerika er ikkje mykje å skryte av. Den kan heller ikkje samanliknast med norsk villaks, seier Roger Hofseth.
Washington Post konkluderer testresultatet på denne måten: « Dommen var definitiv, og overraskande. Oppdrettslaks slår villaks utan problem».
Kokkane trekkjer fram at vinnarlaksen var salta i pakken, noko som gav god smak og fin konsistens. Dessutan var denne laksen den klart billegaste – ti dollar billegare for kiloet enn dei andre.
– Det skuldast at butikkjeda hadde ein kampanje, så det var tilfeldig, seier Roger Hofseth.