– Det heile begynte i Volda skulekorps. Der tok eg først tok til å spele klarinett, før eg gjekk over til trompet, som er blitt mitt instrument.
Det fortel Anders Farstad (37). Han er no frilansmusikar, med base i Aarhus i Danmark – men med heile verda som arbeidsplass.
Mentorar
Og det heile starta altså i Volda.
Anders fortel om tre mentorar som fekk mykje å seie for at han vart musikar: Faren Aksel som var dirigent for skulekorpset, Knut Ose i ungdomssymfoniorkesteret – og musikklærar Elisabeth Stave.
Det skjer-kalenderen: Få med deg det som skjer i kulturlivet på Nordvestlandet
Men sjølv om det var mykje musikk i oppveksten, både trompet og piano, så var vegen fram til ei karriere som profesjonell musikar likevel lang.
– Eg gjekk først Tonheim folkehøgskule, deretter Musikkonservatoriet i Stavanger – før eg avslutta studia mine på konservatoriet i Aarhus, fortel Anders.
Deilig i Danmark
No har han budd 11 år i den danske byen på Jylland, og synest som mange andre at det er deilig å vere norsk i Danmark.
– Her er eg frilansmusikar, og gjer ganske mykje forskjellig. I to og ein halv månad i sommar skal eg spele i Disney-musikalen «Klokkeren fra Notre Dame» på Det Kongelige Teater i København. Det er ni førestillingar i veka. Seinare skal eg spele i musikalen «Les Misérables» i Herning, ikkje langt frå Aarhus.
Sjangrane han arbeider med er mange. Mellom anna er han tilknytt det danske militærorkesteret Slesvigske Musikkorps, som har vore på USA-besøk.
I Moskva
Men den aller siste utanlandsturen var med bandet Jordans Drive. I førre veke spela dei i Moskva, neste stopp blir Sveits.
– Eg er også i Norge på jobb. Det brukar å bli eit par veker i året med skulekonsertar, legg 37-åringen til.
Her har han mellom anna spela saman med tubaisten Daniel Herskedal frå Molde, ein annan norsk musikar som har busett seg i Danmark.
Som lausarbeidar har Anders lært seg å ta ein dag om gangen. Men kvardagen kjem nok til å endre seg ein del i næraste framtid.
I august ventar nemleg sambuaren, tyske Astrid, barn.