Han heiv dei kvite korna utover så fort at lukkaren på kameraet ikkje makta fryse dei heilt fast. Ein vakker effekt.

Takk vere Karl K. Blindheim får vi vite at det er Ragnvald N. Blindheim som tuslar over marka på dette tiårbildet.

Han var fødd 1898 i Jakob-garden på Blindheim. Ragnvald gifte seg med Olga i Juvikgarden på Blindheim, og det var altså også der fotografiet vart fanga inn.

Det er såleis Blimshaugen vi ser heilt i bakgrunnen.

– Dette bildet vart brukt då karane som rodde ut til Langholmen for å berge forliste englandsfararar vart presentert i Markepenaustet i fjor, vert vi fortald.

– Dei fleste av dei berga vart frakta til Shetland med M/K «Njål» saman med ein flokk vigraungdommar 26. mars 1941.

Skipperen var knapt 24 år med ferskt styrmannssertifikat. Den siste som lever frå denne turen er Petter Blindheim i Halifax, Canada.

Ragnvald på bildet tok over garden mot slutten av 1940. Han dyrka opp halvdelen av innmarka på 72 mål, i tillegg til å drive sjøen.

Så også denne karen visste kva arbeid var for noko.