Direktør for Nynorsk kultursentrum, Ottar Grepstad, tok tak i festspeltemaet "makt" då han sette i gong Dei nynorske festspela 2014 i føremiddag. Festspela starta som alltid med å leggje blomar på Ivar Aasen-statuen i Ørsta sentrum.
Skreiv seg til makt
- I meir enn 170 år har nordmenn diskutert det Ivar Aasen sette i gang i 1842. Språkforskarar hentar fram sin faglege respekt når namnet hans blir nemnt, og mange hundre tusen brukar dagleg det språket han fann og forma til skrift. Ivar Aasen skreiv seg til makt, han som aldri tok ordet i ei offentleg forsamling, sa Grepstad ved bautaen.
Viktig forfattar
Ei lita forsamling møtte fram til blomeseremonien, blant dei festspeldiktar Ravatn. Om henne sa Grepstad at også ho har skrive seg til makt - på sju år har ho blitt viktig for mange gjennom sin tenkjemåte og skrivemåte.
Ambisjonar
- Ein heil skriftkultur stod til rådvelde då ho opna forfattarskapen sin med fem ord som kan lesast på fire måtar: Ein gong hadde eg ambisjonar, sa Grepstad.
Opningshøgtida for Dei nynorske festspela går av stabelen seinare i dag, og i kveld står brørne Odd og Åsmund Nordstoga på utescenen i Aasen-tunet. Sjå programmet for festspela her.