Utan brennande eldsjeler som har stått på for denne meir enn hundre år gamle ideen, hadde aldri prosjektet kome så langt som no. Det har vore nok av motkrefter, og mange har sådd tvil om prosjektet sin nytteverdi. Meir enn ei utgreiing har konkludert med at Stad skipstunnel kjem ut med negativ samfunnsnytte.

Men eldsjelene har sørga for at det har blitt halde liv i visjonen. I seinare år er det naturleg å trekkje fram tidlegare ordførar Jan Helgøy (KrF) i Vanylven, men han har selskap av mange. Dei første skissene såg dagens lys allereie i på 1870-talet.

Det første forprosjektet kom på bordet 115 år etter dette, og på det grunnlaget vart LL Stad skipstunnel stifta. Det har vore arbeidd intenst og utretteleg med prosjektet sidan.

Alt ligg no til rette for byggjestart innan fem til seks år, og det første skipet kan segle gjennom den 1.700 meter lange tunnelen i 2027 eller 2028. Tunnelen vil bli den første i sitt slag med slike dimensjonar i heile verda.

I dag kan vi feire, men så må vi bu oss på å jobbe.

Først må vi sikre oss at lovnaden om å bruke 2,7 milliardar på tunnelen held seg opp att vidare. At det er sett av 1,5 milliardar allereie i den første seksårsperioden av Nasjonal transportplan liknar kanskje ein bindande lovnad, men er ingen garanti.

Så må vi snarast starte jobben som gjer at vi kan hauste gevinstane av dette unike, gigantprosjektet. Lokale entreprenørar bør posisjonere seg for å vinne sin del av kontraktane knytt til bygginga av tunnelen. Den er venta å ta fem år.

Dessutan må godseigarar, transportørar, reiarlag, reiselivsbedrifter, kommunar og fylkeskommunane og andre aktørar setje seg i førarsetet.

Tunnelen vil gi tryggare seglas forbi den utsette kyststrekninga ved Stad for skip, gods og mannskap. Det vil redde liv, og det vil gi gevinst for reiarlag og godseigarar som får meir effektiv transport.

Tryggare seglas legg også til rette for å flytte meir gods over frå veg til kjøl. Det er viktig i eit klimaperspektiv, for å lette belastninga av tungtransport på vegnettet og for å trygge livskraftige kystsamfunn.

Tunnelen fjernar også det viktigaste hinderet for å opprette hurtigbåtruter frå Sunnmøre og sørover mot Bergen. Det vil ikkje minst knyte Sunnmøre og ytre Nordfjord tettare saman som eitt bu- og arbeidsmarknadsområde.

For turismen opnar også tunnelen heilt nye moglegheiter. Den kan i seg sjølv verte ein stor attraksjon, og det vil vere mogeleg å etablere transport gjennom tunnelen som ein del av framtidige reiselivsprodukt.

Stad skipstunnel opnar heilt nye moglegheiter for ein heil region. Den vil binde oss tettare saman, gi ny verdiskaping og trygge busetnaden i kommunar som i dag slit med fråflytting. Nye dører opnar seg, men vi må sjølv gå gjennom dei.