Fiskerikonsernet Nergård går vidare med planane om å byggje eit nytt fabrikkanlegg i Måløy, melder Fjordenes Tidende.
Styret i selskapet tok i eit møte denne veka eit nytt skritt i retning av å realisere eit anlegg på om lag 2000 kvadratmeter med fryselager på Trollebø.
Administrerande direktør Tommy Torvanger i Nergård Eiendom seier at anlegget vert det største i konsernet, og at investeringa berre i anlegget vil vere på minst 200 millionar kroner.
Dei tek sikte på å vere klare til å ta i mot makrell når sesongen startar hausten 2015. Og det vert behov for ny arbeidskraft - i kommunen der mange fiskeriarbeidsplassar har gått tapt dei siste åra.
– Det vil vere behov for folk, men kor mange vi treng, kjem av på kva for skiftordningar det blir. Men at det vert 15–20 arbeidsplassar er heilt sikkert, seier Torvanger til avisa.