Først ved 18.45-tida røyste politikarane i fylkestinget seg for å vise stemmeteikn i den vanskelege saka.
Tidlegare måndag landa fylkesutvalet på at dei ville utsettje saka, men berre 13 røysta for eit slikt framlegg i fylkestinget.
Les også: Fjord1-striden kan bli utsett igjen
Det har vore reist tvil om sal av fylkeskommunen sine aksjar i Fjord1 til konkurrenten Torghatten, er lovleg. Men med knappast mogleg fleirtal stemte politikarane for sal etter eit framlegg frå Noralv Distad (H) - som var lik tilrådinga frå fylkesrådmannen.
Dette er vedtaket:
«Sogn og Fjordane fylkeskommune sel aksjane i F1 Holding AS til Torghatten ASA. Salet inneber eitt trinnvis sal av aksjane ved at fylkeskommunen først sel 50% av aksjane, medan Torghatten får ein rett (opsjon) til å kjøpe resterande 50 % tidlegast 1. januar 2017. Om Torghatten ASA ikkje nyttar denne opsjonen, har fylkeskommunen høve til å selje resterande 50 % til Torghatten ASA etter 1. januar 2019.»
Inntektene frå salet vil politikarane nytte til å betale ned gjeld, heiter det i ei pressemelding frå Sogn og Fjordane fylkeskommune.
Høgre splitta
Høgre si gruppe var splitta i saka. Noralv Distad og Sonja Øvre-Flo røysta for eit sal, medan Bjørn Hollevik og Anne Lilleaasen ville ha saka utsett, melder NRK Sogn og Fjordane.
Følg Sunnmørsposten jobb og næringsliv på Facebook
Ifølgje kanalen kom det fram under møtet at NSB og andre pengesterke aktørar har vore interessert i kjøpe aksjane.
Varslar kamp
Fylkesrådmannen råda politikarane til å selje aksjane sine trinnvis til Torghatten frå eigarselskapet F1 Holding.
Sævik-familien i Herøy eig i dag 41 prosent av Fjord1 gjennom selskapet Havilafjord, og seier dei er villeg til å ta saka heilt til Høgsterett dersom dei ikkje får nytte forkjøpsrett ved sal av aksjar.
Herøy-reiar Per Sævik gir ikkje opp kampen om aksjane trass vedtaket i fylkestinget.
– Vi føler at det har blitt brukt finurlege metodar for å unngå forkjøpsretten som vi har hatt ifølgje aksjelova, seier Sævik til NRK Møre og Romsdal måndag kveld.