Det einaste selskapet som forsikrar skog, Skogbrand, har hatt tilbod om gratis forsikring i år i samband med sitt 100 års jubileum. Interessa var ikkje overveldande – sjølv med orkanen Dagmar ferskt i minnet for skogeigarane.
- Berre fire prosent takka ja, seier marknadsdirektør Kjetil Løge i Skogbrand.
Tapt store summar
Frå før var berre litt over ti prosent av alle skogeigarar i Møre og Romsdal og Sogn og Fjordane forsikra, medan 60-70 prosent var forsikra på Austlandet. Dermed har skogeigarane på vestlandet tapt store summar etter orkanen Dagmar i jula i fjor.
- Kvifor er det så liten interesse på Vestlandet?
- På Vestlandet er det liten kultur for å drive med skogbruk, og skogeigarane er ikkje klar over verdiane skogen har, seier Kjetil Løge i Skogbrand.
Han trur også det er mange som ikkje har fått med seg at Naturskadefondet har slutta å dekkjeskader på skog.
- Vi slit med å få det kommunisert, og det er lågare bevisstheit rundt dette på Vestlandet, seier Kjetil Løge.
Lågaste premien i Norden
Skogbrand har betalt ut 60 millionar kroner i erstatning etter Dagmar.
- Kva dekkjer forsikringa?
- Verdien av det som er øydelagt, og kompensasjon for at det vert dyrare å drive ut. Forsikringa dekkjer også framtidig verditap på ung skog, seier Kjetil Løge i Skogbrand.
Han opplyser at prisen heller ikkje vert avskrekkande etter at jubileumstilbodet er over.
- Vi har tatt ei krone per dekar, og det er den desidert lågaste premien i Norden, seier marknadsdirektøren i Skogbrand.
Les meir om Skogsatsinga som vart tatt av vinden i papiravisa 27.desember.