Redningsskøyta «Simrad Buholmen» var ute på eit oppdrag litt utanom det vanlege, natt til torsdag, melder Dagbladet.
Eit tips om at ein terrasse låg og dreiv i Nordfjorden viste seg nemleg å stemme, og redningsskøyta tok jobben med å slepe verandaen inn til Måløy.
- Slepet gjekk heilt knirkefritt. Hamnekontoret har overtatt slepet, og ventar no på at eigaren skal melde seg, seier båtførar Marius Strømmen på «Simrad Buholmen» til avisa.
3 x 7 meter og i god stand
Ifølgje Dagbladet er terrassen som er funnen på omlag 3 x 7 meter og i god stand. Gelenderet er kvitmåla og golvet i impregnert materiale.
- Vi har ikkje kome til nokon betre teori enn at det er eit hus i strandakanten som har fått merke kreftene til ekstremveret «Dagmar». Terrassen har truleg blitt skylla inn ein stad, for så å bli løfta ut i open sjø av vannmassane, onsdag, seier Strømmen om kva dei trur er forklaringa.
Torsdag kveld hadde han følgjande kommentar til smp.no:
- Vi trur no at vi har funne eigaren, og er faktisk og ser på den mulege «åstaden» no.
- Huset ligg på Halneset, rett vest for Måløy, men vi har ikkje fått fatt i eigaren enno, seier han - og ler før han held fram:
- Han har dessutan bygt seg ny veranda. Litt lenger oppe enn der den førre låg.