Seglasen «Kystpilegrimsleia 2014» går gjennom fem fylke langs Veslandskysten: Rogaland, Hordaland, Sogn og Fjordane, Møre og Romsdal og Sør-Trøndelag.
Frå 23. til 28. juli går det freda hurtigruteskipet MS Nordstjernen frå Stavanger til Trondheim i det som vert ei ny pilegrimsleie langs kysten. Laurdag opna riksantivar Jørn Holme offisielt leia på øya Selja.
Formelt lansert
Kystpilegrimsseglasen kom til Selja fredag kveld, og laurdag lanserte riksantikvar Jørn Holme formelt Kystpilegrimsleia frå Rogaland til Nidaros.
– På Selja var det fulle båtar og mange som deltok. Riksantikvaren blei rørd til tårer. Han snudde seg og sa: Dette er magisk, seier prosjektleiar Anette Christiansen i Kystpilegrimsleia.
Historia om Sunniva og Selja vart fortald, Den norske Pilegrimskvartetten song, og det var middagsbøn leia av biskop Halvor Nordhaug, riksantikvar Holme og sokneprest i Selje, Kari Leine Balog.
Mange stopp
Laurdag ettermiddag gjekk seglasen vidare til St. Jetmund-kyrkja på Åheim, og søndag morgon vart pilegrimane bussa til Herøy gard. På gudstenesta i Herøy, på den gamle kyrkjetoma der sto kyrkje i middelalderen, deltek mellom anna biskop Ingeborg Midttømme.
– Vi fekk båtkortesje då vi kom til Åheim. Det var flott å sjå det lokale engasjementet. Då vi drog frå Herøy fekk eg høyre at besøket hadde gitt dei Herøyspel-kjensler, seier Christiansen.
– På denne turen har vi synleggjort ein variant av ei reise langs kysten, seier ho.Seglasen vert avslutta kvelden 28. juli med felles pilegrimsvandring inn til Olavsvaka i Nidarosdomen. Dette er starten på Olsokdagen til minne om dagen då Olav den Heilage fall i slaget på Stiklestad i 1030.
