– Eg går tur når eg kan. Før jobb om morgonen, til eksempel, seier Jannike Madsen, på spørsmål om korleis ho har klart å gå 255 turar til 53 ulike turmål sidan konkurransen starta 1. mai.
Konkurransen starta i Ålesund og omland i mai, etter same modell som har vore i Nordmøre og Romsdal i mange år, og varer til 31. oktober. 2572 brukarar har registrert 23 969 turar, og talet aukar dag for dag, skal vi tru dagleg leiar for Friluftsrådet i Ålesund og omland, May Britt Haukås.
– Vi syns dette er ein fantastisk suksess som visar at Stikk UT er ein sterk motivasjonsfaktor for å kome seg ut på tur, og eit viktig bidrag i folkehelsearbeidet, seier ho.
Tretindanibba
Jannike Madsen frå Skodje meiner konkurransen har vore ein god motivasjon til å kome seg meir ut, og til å finne nye turmål.
Den aller tøffaste turen på lista vart gått denne helga, av Silje Sandøy Grønning og Margareth Lossius Bjerke frå Valldal. Det var turen opp Tretindanibba i Norddal.
– Vi likar jo å ha litt utfordringar, seier Silje Sandøy Grønning.
Ho meiner konkurransen har hjulpe på motivasjonsfaktoren, men seier ho foreløbig har heldt seg til turar i nærmiljøet.
– Her i Norddal har eg gått fem av turane på lista, seier ho.
Grønning seier det er kjekt å oppdage nye turar i distriktet.
– Så får vi sjå kva mei det blir etter kvart.