Får ny ambulanse- og rutebåt

Det er Samferdselsutvalet i Møre og Romsdal som samrøystes har gjeve reiarlaget dette løyvet. Dagleg leiar i Norwegian Rig Shuttle AS er Kjetil Hantveit, og selskapet held til i Gulen.

I søknaden skreiv Hantveit at bakgrunnen er tildeling av anbod på ambulanse- og samfunnsbåt i Sande kommune.

Samarbeid

Båten er eit samarbeid mellom Helse Møre og Romsdal og Sande kommune.

Båten, som blir levert av Maritime Partner, er utforma som ambulansebåt og skal operere med beredskap i området for Helse Møre og Romsdal.

I tillegg skal båten fungere som ein samfunnsbåt for Sande kommune.

I anbodet heiter det at «faste anløps- og hentesteder er Larsnes, Åram, Voksa, Kvamsøya og Sandsøya».

30 passasjerar

Båten selskapet skal nytte er utrusta med sittepass til 30 passasjerar.

Fartøyet vil ha si heimehamn ved Larsnes.

Oppstart av rutetilbodet med ny båt er sett til 1. april i år. Anbodet har ei varigheit på åtte år, med opsjon på ytterlegare ti år.

Det er lagt opp til morgonrute, ettermiddagsrute – og ei laurdagsrute.