– Samferdsledepartementet må sjå på om det er mogleg å redusere krava i tunnelane på fylkesvegnettet, samtidig som ein opprettheld eit minimumsnivå for trafikksikkerheit og framkomst.
Det uttaler dei tre fylkesordførarane i Vestlandsrådet i ei pressemelding.
Frist til 2025
Fylkesordførarane Jon Askeland i Vestland, Marianne Chesak i Rogaland og Line Hatmosø Hoem i Møre og Romsdal gjer det klart at alle dei tre fylka er avhengige av meir statlege overføringar for å kunne fullføre noverande krav som staten har pålagt fylkeskommunane.
Krava er basert på eit EU-direktiv frå 2015 og gjeld fylkeskommunale tunnelar som er lengre enn 500 meter og der det køyrer meir enn 300 bilar per døgn.
Tunnelane skulle i utgangspunktet utbetrast før 2020, men fristen blei forlenga til før 2025.
Langt dyrare enn rekna med
Sjølv denne fristen er utfordrande å nå for fleire. Ifølgje pressemeldinga er oppgraderingsprosjekta meir omfattande og dyrare enn det Statens vegvesen la til grunn, utan at dette er tilstrekkeleg kompensert.
– Kostnadene med å oppfylle krava er langt høgare enn dei midlane som er tildelte. Trass i at vi alle har lagt inn vesentlege eigne midlar, seier dei tre fylkesordførarane.
Dei legg til at viss dei strenge statlege krava til sikring blir oppretthaldne, er alternativa enten å utsetje oppgradering, eller at denne går utover andre viktige vedlikehalds- og sikringstiltak.