Samtidig fall prisane på elektrisitet på Austlandet og i bergensområdet til billegnivå.
– Forklaringa er grovt sagt at Sunnmøre vart ramma av svensk og delvis europeisk prisnivå på elektrisitet, medan området sør for oss fekk nyte godt av låge prisar på grunn av stor produksjon i snøsmeltinga. Det finst ikkje store kraftlinjer som kan hente hit nok billeg elektrisitet, forklarer salssjef John Halsa i Tafjord Marked.
ÅBO-avtale.
Den store prisforskjellen kjem fram av to straumrekningar av same type gjennom avtalen som Ålesund Boligbyggelag har med Kraftinor:
I juni var spotprisen for elektrisitet i Osterøy i Nordhordland 20,50 øre pr. kWh medrekna avgifter og før moms.
I Spjelkavik kosta elektrisiteten i juni 33,46 øre pr. kWh med avgifter og før moms.
Fastpris og linjeleige til BKK nett og Tafjord kraftnett kjem i tillegg.
Prisområde.
Møre og Trøndelag er eit anna prisområde enn landet lenger sør, og får tilført straum frå Nord-Norge og Sverige der atomkraftproduksjonen har vore redusert.
– Det er ein tendens her til at vi vert påverka av det svenske prisnivået på elektrisitet, seier John Halsa.
Sunnmøre har for liten eigen produksjon av kraft, og må ha import. Men det er ikkje store nok linjer som kan transportere inn billegare straum frå indre Sogn.
Det skal linja Ørskog–Fardal rette på. Den er ekstra forseinka etter at lagmannsretten dømde politisk tukling ulovleg.
– Kan vi risikere svært store prisforskjellar til vinteren?
– Det vert nok litt høgare pris her enn i Sør-Norge, men prisen her treng ikkje verte så mykje dyrare, seier salssjefen i Tafjord.
Vinteren.
Eg fryktar kva straumprisen blir i vinter, seier Torill Ytreberg i NHO.
Lite nedbør som det har vore i lang tid kan medføre høg pris i eit område som frå før manglar kraft til tusenvis av husstandar. Heldigvis er det kome ny linje til Sverige som fører inn straum, men det er likevel stort behov for straum sørfrå.