– Vi skal byggje like ved skitrekket, på nedsida av vegen ned mot vatnet, fortel marknadssjef Steinar Asbjørnsen i sykkylvsbedrifta Mørelaft AS.
Mørelaft er ifølgje dei sjølve den leiande leverandøren av laftehytter på Nordvestlandet. Sidan oppstarten har dei levert over 300 laftehytter- og hus på Fjellsetra, Bjorli, Strandafjellet, Strynefjellet og Stordal.
Startar ved årsskiftet
Prosjektet dei no gjer klart for bygging består av to firemannsbustader og tre tvillinghytter. Og alle skal reisast i tømmer. Mørelaft kjem til å setje seks til åtte mann på jobben når dei no snart kjem i gang, med Kenneth Brunstad som byggjeleiar.
– Vi reknar med å begynne på den første firemannsbustaden rundt årsskiftet. Deretter set vi opp ei tvillinghytte, og så vurderer vi behovet etter kvart, seier Asbjørnsen.
Idyllisk plassering
Sjølv har han stor tru på prosjektet, med ei plassering like ved skisenteret og langrennsløypa.
– I tillegg ligg det like ved vatnet, så det er snakk om ei idyllisk plassering, meiner marknadssjefen. Det er også stadig fleire som føretrekkjer ei leilegheit framfor ei enkeltståande hytte.
Nøkkelferdige
Alle bueiningane i Nysætervatnet Hyttegrend blir leverte nøkkelferdige. Men kjøparen kan få gjere enkelte val - som til dømes farge på kjøkenet og slikt.
– Men utvendig må vi ha ein lik stil for alle, legg Asbjørnsen til.
– Kvar eining i firemannsbustadene blir på rundt 70 kvadratmeter, med to soverom, kjøken og stove - og med felles inngang. Hyttene blir på ca. 90 kvadrat, opplyser Asbjørnsen.
Les fleire nyheiter frå Indre på smp.no
Alle bueiningane vil også få balkong eller terrasse, og boder og moglegheit for carport. Toppleilegheitene vil også ha hems.
– Kva ligg prisnivået på?
– Prisen for leilegheitene startar like under to millionar kroner, medan einingane i tvillinghyttene begynner på ca. tre millionar.
– Har du sjølv sikra deg ei av leilegheitene?
– Nei, eg skulle gjerne det. Men eg har akkurat kjøpt meg hus, så det passar ikkje akkurat no, seier Steinar Asbjørnsen.
