Ulven som ein fryktar har drepe ti lam og sauer på Hellesylt, blei søndag kveld observert i Søvikdalen og Ramstaddalen i Sykkylven. Jegerar i området fekk straks fellingsløyve på ulven. Frå før er det gitt fellingsløyve for ulv i Stranda kommune.
– Vi gav fellingsløyve i Sykkylven seint søndag kveld, opplyser Ulf Lucassen, som er konstituert assisterande miljøverndirektør hos Fylkesmannen i Møre og Romsdal.
Frårår hundar
Søndag var det vurdert å få hjelp av sporhundar frå Austlandet for å finne ulven som skal vere sett både i Stryn, Hornindal, Stranda og Sykkylven.
– Eg har rådd frå å bruke slike sporhundar og tilrådd postering, seier Lucassen, som meiner det vil vere betre at jegerar altså sit på post i området der observasjonar er gjort.
Han meiner ein må vere målretta og følgje opp der dyret er sett.
Sikker på ulv
– Kva om ulven blir sett til dømes i Ørsta. Kan han fellast der?
– Det får vi ta som det kjem, og vi vil følgje opp der ulven blir observert. Ein ulv kan flytte seg ganske mange mil i døgnet.
– Og de er sikre på at det er ulv?
– Ja, det er vi, seier han.
Ventar på observasjon
Fann fleire drepne dyr - ti jegerar klare for ulvejakt Lam drepne på Hellesylt
– Vi har ikkje sikker observasjon etter i går kveld, og vi går no og ventar på observasjon, seier Kjell Perry Drotningshaug, som er leiar i viltnemnda i Sykkylven.
Svensk ulv
Lucassen trur ulven som no er observert i Sykkylven kjem frå Sverige.
– Det blei gjort sikre observasjonar av to ulvar i Dovre andre veka i mai.
Den 15. mai blei ei ulvetispe felt i Vågå, og det er truleg partnaren som har vandra vidare.