I ei kort pressemelding frå Stranda kommune fredag, går det fram at rådmann Per Ivar Lied går frå stillinga si frå og med i dag.
Assisterande rådmann Kjartan Lied er konstituert i stillinga inntil vidare.
Denne veka vart det kjent at Lied var mellom søkjarane til stillinga som rådmann i Ålesund.
I pressemeldinga heiter det at "Stranda kommune og rådmann Per Ivar Lied har i dag blitt einige om å avslutte Per Ivar Lied sitt arbeidsforhold i Stranda kommune. Lied fråtrer stillinga som rådmann frå dags dato".
Avisa Sunnmøringen skriv at Lied får ei etterlønn tilsvarande sju månader løn frå 1. januar utan arbeidsplikt, og vidare at Stranda kommune dekkjer advokatutgiftene han har hatt, etter rekning.
Lied er den andre sunnmørsrådmannen som forlet stillinga si på to dagar. Torsdag vart det klart at rådmann Erlend Krumsvik i Herøy også gjekk på dagen.