Politiet: Mann hadde kilovis med amfetamin og hasj
Mannens sin forsvarar opplyser at mannen i 30-åra som no er sikta for grov narkotikakriminalitet, seier han skulle ha narkotikaen sjølv.
– Ikkje for sal
Den sikta samtykka til å bli fengsla i Sunnmøre tingrett for fire veker den 31. mars. Ifølgje forsvararen erkjenner mannen at han har oppbevart narkotikaen.
Men han er ikkje samd i opplysningane politiet gjekk ut med onsdag, om at den Volda-busette mannen reiste til Austlandet for å hente narkotika som skulle seljast på Sunnmøre.
– Han erkjente med ein gong oppbevaring av stoffet og viste politiet kvar dei kunne finne det. Men han seier at dette var til eige bruk, seier advokat Morten Bjønness.
Lensmann: – Gjennombrott
Lensmann Guttorm Hagen meiner beslaga av kring 2,5 kilo amfetamin og hasj er eit gjennombrott mot eit miljø i Volda som dei òg koplar til anna kriminalitet.
– Vi har sett at det har vore ein del lovbrott knytt til dette miljøet, seier Hagen og fortel at det dreiar seg om alt frå vald, truslar, tjuveri og skadeverk.
Advokat Bjønnes vil ikkje svare på det no, men seier at det skal bli interessant å høyre grunngjevinga frå lensmannen når saka kjem for retten.
I fengslingspapira blir det vist til ein anna tiltale mot mannen, men forsvararen opplyser at dette i hovudsak ikkje er narkotikakriminalitet.
Politisamarbeid
Politiet har samarbeida med politiet på Austlandet i etterforskinga.
To gongar blei mannen ransaka, ein gong i bil på Austlandet, då han skal ha vore på veg i bil til Volda. Den andre gongen var ved eit busstopp i Volda etter at han skal ha kome frå Austlandet.
Ifølgje papira frå tingretten blei først funne kring 1,7 kilo amfetamin, og ei veke etterpå teke beslag i kring ein halv kilo amfetamin og hasj.
(saka held fram under)
Politiet: Mann hadde kilovis med amfetamin og hasj
– Meiner politiet det har vore ei oppblomstring av narkotikabruk i Volda?
– Som i andre tettstader er det også ein del misbruk i Volda, og vi har retta innsatsen mot dette miljøet, svarar Hagen.