Tysdag kveld rykka naudetatane ut etter at det var full fyr i ein komfyr i ein bustad i Brandal. To utanlandske bebuarar som var til stades i leilegheita vart tatt med til lege for sjekk.
Etter det Vikebladet/Vestposten erfarer er leilegheita utleigd til same person som budde i huset som vart totalskadd i brann 9. juni. Dette kan politiet stadfeste.
– Begge dei to som budde i leilegheita budde også i det andre huset som brende, seier Leif Arne Mork hos lensmannen i Hareid og Ulstein.
– Og ut frå dei opplysningane vi har i dag kan det også sjå ut som at det er liknande brannårsaker, seier Mork til Smp.no.
Politiet har tidlegare opplyst at brannen 9. juli oppsto i samband med bruk av smultgryte.
Dei tekniske undersøkingane på den første brannstaden er fullført, men politiet har ingen ferdig rapport.
– På den andre brannstaden har arbeidet med den tekniske etterforskinga ikkje starta, seier Mork dagen etter brannen.
Mork er likevel ganske sikker på at ingen av brannstiftingane er bevisste handlingar.
– Ut frå det vi veit i dag er det ingenting som indikerer at desse brannane er forsettleg påtent.