– Folk er raske med å kome seg ut, og det er jo positivt at det er fleire folk på fjellet. Men etter regn treng terrenget ofte fleire dagar på å tørke opp, seier Oddmar Remøy.
I sommar har han hatt som jobb å gjere dei aller nødvendigaste reparasjonane av stien over Rundefjellet, ein sti som i år er breiare og meir gjørmete enn kanskje nokon gong.
60.000 i året
– Før fekk stiane også vinterpause, det får dei ikkje lenger. Delar av stien over Rundefjellet blir brukt av rundt 60.000 i året, ifølgje Remøy.
Ola Betten hos Fylkesmannen var tidlegare i sommar på tur på Rundefjellet.
– Det er veldig dårleg mange stader, stadfester Betten.
Vil vinne erfaring
Betten ser no fram til at det blir bygt meir sti i treverk og stein gjennom naturreservatet på Rundefjellet.
– Utfordringa enkelte stader er at det er bratt. Vi vil gjerne sjå på det ÅST har gjort av arbeid på Rundefjellet i sommar og vinne erfaring gjennom det, seier Betten.
Dette er første gong at fylket byggjer sti gjennom eit naturreservat.
– Veldig bra
– Det ÅST har gjort ser veldig bra ut, ser veldig solid ut. Det ferske treverket lyser litt opp i terrenget, med det vil mørkne etter kvart. Ein slik sti gjer at det ikkje blir slitasje i terrenget, og det demmer heller ikkje opp, slik at naturen kan utvikle seg friare, seier Ola Betten hos Fylkesmannen.
Seinare i haust står ei ny strekning på 8–900 meter for tur. Dette er arbeid som skal ut på anbod.
– Vi satsar på haustarbeid og vil sende dette ut på anbod snart. Det er behov for grøfting, legging av stein og å byggje treverk ein del stader, seier Betten.
Reparerer seg sjølv
Og naturen reparerer seg sjølv berre den får nok ro.
– Over Goksøyrmyra var det tidlegare ei to til fire meter brei moldrås. Då vi sperra av, tok det to år før ein kunne byrje å gå der igjen med redusert trafikk, seier Oddmar Remøy.
