På 60 meter hekk sprang Warholm inn til ny personleg rekord på 7,82. Seinare på kvelden viste han også kven som er best på 400 meter. Han distanserte resten av feltet, og kom inn til tida 47.36. Det er den tredje beste 400 meteren innandørs i Norge gjennom tidene. For ordens skuld har han også dei to første plassane.

- Det er viktig å vere topp tre, seier Warholm.

Fullt hus for fulle tribunar

Dei over 1500 oppmøtte fekk sjå fleire gode prestasjonar på det blå tartandekket i den nyopna Ulsteinhallen. Heimehåpet Warholm innfridde alle forventningane, og seier at trykket på tribuna kan slå ut begge vegar.

- Det er jo utruleg kjekt at so mange har teke turen for å sjå på, og eg kjenner jo litt på nervane før start. Særleg før 400 meteren kjende eg pulsen godt.

Warholm opna ganske raskt på 400 meteren, og fekk merke det på slutten. Han er likevel fornøgd med den harde satsninga, og seier at gjennomføringa er bra.

- Eg slit litt med slutten, men eg måtte opne so hardt for å moglegheit til å ny personleg rekord.

Samstemt mål

Trenaren til Warholm, Arve Hatløy, seier at den første dagen gjekk etter oppskrifta.

- Dette var to forventa gull, han var storfavoritt i begge øvingane. Det er rett og slett ingen som matchar han der, seier trenaren.

Dei har begge høge forventningar til helga, og meiner at det kan komme fleire gull i premiesamlinga til Warholm. Totalt skal han delta i åtte øvingar, og er medaljekandidat i alle.

- Han kan fort sanke fem-seks gull i løpet av helga. Å ta alle åtte er nok litt i overkant, då skal verkeleg alt klaffe, seier trenar Hatløy.

Den målsetninga meiner Warholm også er fornuftig.

- Eg er fornøgd viss eg klarar det. Samtidig skal ein hugse på at det er mange gode utøvarar med, og ein skal ha marginane på si side for å klare å ta so mange gull, fortel Warholm.

Vil ha meir

Fornøgd er i alle fall ikkje Warholm om det stoppar på to gull.

-Det er litt skuffande viss det stoppar med desse to. Eg veit at det er tøffare konkurranse i fleire av dei øvingane som kjem, men eg bør klare fleire for å vere fornøgd med helga.

Han innrømmer at det hadde vore utruleg stas å ta alle åtte gulla, men at det blir vanskeleg. Trenar Hatløy seier at det er ei øving som blir særleg vanskeleg.

- På 60 meter har han rett og slett ikkje fått nok trening innandørs. Den har han ikkje heilt taket på, og er langt i frå den største favoritten, seier Hatløy.