– I gruppespelet overpresterte vi i grunnen. Der spelte vi tre gode kampar og sikra oss plass i a-sluttspelet, fortel Jon Erik Mathiesen, som saman med Per Even Brauteberg er ansvarlege for Ørskog/Stordal sitt juniorlag.
Tok leiinga
Torsdag føremiddag var det dermed duka for 1/16-finale mot Hallingdal, eit lag som tapte finalen i same turnering i fjor – etter straffespark-konkurranse. Men Ørskog/Stordal gjekk respektlause til verket og tok leiinga ved midtbanespelaren Eirik Kobbevik Uren.
– Det var ei kontring der eg sprang inn i 16-meteren og sette ballen i mål med eitt touch, forklarer Uren.
(Saka fortsetter under bildet)
Dessverre utlikna Hallingdal like før pause. I 2. omgang var det Hallingdal som styrte spelet, medan Ørskog/Stordal låg lågt i bana og satsa på kontringar. Mellom Hallingdal fekk 2-1 tidleg i omgangen og 3-1 heilt på slutten hadde Ørskog/Stordal nokre overgangar som kunne ha blitt meir ut av med litt betre presisjon.
Men Ørskog/Stordal-keeperen Jørgen André Balseth hadde også eit par fine involveringar. Og til slutt var det ingen som klaga på at fjorårsfinalistane vann til slutt.
– Ikkje sjanselause
– 3-1 var vel eit relativt rettvist resultat. Eg synest vi spelte godt defensivt. Men skulle vi ha vunne denne måtte vi ha utnytta overgangane betre. No skal karane få lov til å vere skuffa ei stund. Men alt i alt har vi gjort ei god turnering, meiner trenar Jon Erik Mathiesen.
(Saka fortsetter under bildet)
Og skuffa var spelarane hans – i alle fall for ei stund.
– Hallingdal var vel litt betre enn oss. Men vi var jo ikkje sjanselause. Totalt sett har vi hatt ei bra turnering, og ikkje minst eit godt gruppespel, fortel Eirik Kobbevik Uren og Jørgen André Balseth.
For unge damer?
Begge dei to Ørskog-karane trivest på Norway Cup. Eit samarbeid med Stordal er einaste moglegheit til å få til eit juniorlag.
(Saka fortsetter under bildet)
Under Norway Cup er også to spelarar frå Norborg med; Tor Abelseth og Jesper Voss. Det same er Herd-spelaren Amund Rørstad. Men dette er karar som opphavleg kjem frå Ørskog og Stordal.
– Det har vore ei artig turnering med ein fin gjeng. Vi har hatt fine dagar i Oslo, seier Jørgen André Balseth.
– Eg skulle til å seie at vi kan sjå på damer, men dei begynner å bli litt unge for meg no, flirer Eirik Kobbevik Uren.
PS. Til dagleg spelar desse karane både for Ørskog/Stordal i 2.-divisjon junior og for Stordal/Ørskog i 6.-divisjon. Balseth er også keeper for Ørskog sitt G16-lag.
– Eg skal innrømme at det er litt mykje med tre kampar i veka, men neste år er eg i alle fall for gammal til G16-serien, seier han sjølv.