- Utruleg herleg, smilte Brandal etter kampslutt.
Han spelte ikkje eit sekund etter pause, men det var heller ikkje nødvendig. For dei tre måla Brandal scora frå det første til det 13. minuttet avgjorde i realiteten semifinalen. Då stod det 3-0 etter tre fine mål av Brandal – og Bergsøy verka noko resignerte.
Erfaring frå 4.-divisjon
Før pause plussa Christian Nykrem Korshaug på til 4-0. Mot slutten av andre omgang reduserte både Markus Ihle og Pijus Marcinkevicijus for Bergsøy, men veldig spennande vart det aldri.
- Då vi reiste nedover tenkte eg i grunnen ikkje over kor langt vi kunne nå. Men eg må innrømme at eg er overraska over at vi er i finalen. Laget består av spelarar frå to kull som ikkje har spelt så mykje i lag tidlegare, seier August Brandal.
Sjølv har han vore innbytar på a-laget til Hareid i 4.-divisjon i vår. Det same har Henrik Holstad og ved eit par høve Markus Hareide. Dessutan har kapteinen Håvard Mork Breivik allereie spelt a-lagsfotball sidan i fjor vår.
Og ingen av desse er altså overårige. Så i motsetning til Bergsøy stilte Hareid med fleire spelarar som har erfaring frå vaksenfotballen.
- Tapte fortent
- Ingenting å seie på at vi tapte denne kampen. Vi verka skikkeleg slitne. Dessutan hadde vi berre to utespelarar på benken på slutten, medan Hareid hadde langt fleire å setje inn. Vi scora eit par på tampen, men då var det i realiteten over. Hareid gjekk ut i 100 og hadde ikkje minst ein god spiss som var livsfarleg. Dei vann fortent, seier Bergsøy-trenar Fredrik Muren.
- Spissen han siktar til er sjølvsagt tremålsscorar August Brandal.
Gull i 2015
Hareid møter Førde i finalen fredag føremiddag. Hareid tok gull i denne klassen i 2015 – og sølv året før. Så tradisjonane skulle i alle fall vere dei beste.
Men Førde viste i sin semifinale mot Rosendal at dei blir ein knalltøff finalemotstandar. Førde vann 2-0 i kampen som gjekk på bana nokre få meter frå lokaloppgjeret Hareid-Bergsøy.
Bergsøy møter dermed Rosendal i bronsefinalen.
- Vi får kvile oss i kveld og gjere det beste ut av bronsefinalen, varslar Fredrik Muren.